Vildi deila upplifun sinni og tók upp vélina

„Ég fór á Eistnaflug árið 2008 í fyrsta sinn og varð svo heillaður af þessu að ég fór að hugsa, hvar eru myndavélarnar til að taka þetta upp?, og þá kviknaði hugmyndin um að taka upp tónleikana,“ segir þúsundaþjalasmiðurinn og tónlistarunnandinn Siggi Jensson.

Hann heillaðist af hátíðinni og vildi deila upplifun sinni en gekk með hugmyndina um nokkurt skeið. „Ég ræddi svo við Stefán Magnússon, skipuleggjanda hátíðarinnar og við ákváðum að hjóla í þetta árið 2014, þegar hátíðin var haldin í tíunda skiptið og gáfum þetta út í ár þegar hátíðin átti tíu ára afmæli.“

Tónleikarnir eru nú komnir út, en um er að ræða 4 diska dvd-pakka með 46 hljómsveitum sem komu fram á hátíðinni og pakkinn inniheldur einnig heimildarmynd um hátíðina. „Ég er framleiðandinn, Hallur Örn Árnason er leikstjóri og meðframleiðandi myndarinnar er Grímur Hákonarson. Ég fékk fyrirtæki til þess að koma og taka upp tónleikana,“ segir Siggi.

Verkefnið var að stórum hluta styrkt af fyrirtækjum í Fjarðabyggð.

Hann hefur komið að kvikmyndatöku í Los Angeles og þekkir því til kvikmyndagerðar sem þessarar.

Heimildarmyndin um hátíðina var til að mynda opnunarmynd á Reykjavik Shorts&Docs hátíðinni í Bíói Paradís.

Þessi framleiðsla Sigga hefur fengið mikið lof og verður myndapakkinn til umjföllunar í merku erlendu rokktónlistartímariti. „Ég má því miður ekki nefna titil tímaritsins en það er svakalega mikill heiður að þeir ætli að fjalla um þetta.“ Pakkinn er fáanlegur á eistnaflug.is, 12 Tónum, Smekkleysu, Geisladiskabúð Valda.