Ánægð með afstöðu Ólafar

„Þetta eru náttúrulega mjög góðar fréttir. Ég tek þessu fagnandi og það væri mjög gaman ef þetta gengi eftir,“ segir Kristín Cardew um fréttir af því að Ólöf Nordal innanríkisráðherra vilji afnema mannanafnalög. Ólöf sagði í Bítinu á Bylgjunni í gær að frumvarp væri í smíðum í ráðuneyti hennar sem þó myndi líklega ekki ganga svo langt.

Kristín er móðir Harrietar og Duncans Cardew en þau eru skráð stúlka og drengur í þjóðskrá þar sem nöfn þeirra fást ekki samþykkt. Harriet var synjað síðasta sumar um vegabréf sökum nafnsins og varð það til þess að fjölskyldan kærði úrskurðinn til innanríkisráðuneytisins. Ekki er búið að afgreiða kæruna.

„Það er ótrúlegt að hægt sé að synja íslenskum ríkisborgurum um vegabréf,“ sagði Kristín við blaðamann Vísis í apríl síðastliðnum.

„Hún ætlar að leggja fram frumvarp í haust þannig að það er eftir að sjá hvað gerist. Það þarf að samþykkja frumvarpið svo eitthvað breytist. Nú er bara að bíða og vona en við náttúrulega erum enn með kæru inni út af Harriet og ég reikna með að við tölum við Ragnar [Aðalsteinsson, lögmann fjölskyldunnar] í haust og skoðum stöðuna,“ segir Kristín nú.

„Þetta snýst líka um rétt barns til að hafa skilríki eða vegabréf þannig að ef þetta dregst þá höldum við okkar striki. En mér finnst þetta góðar fréttir og frábært hjá Ólöfu að taka af skarið,“ segir Kristín.

Ólöf gaf lítið fyrir þau rök að foreldrar gætu misnotað vald sitt ef mannanafnalög væru afnumin í viðtalinu í gær. Hún spurði hvort foreldrum ætti ekki að vera treystandi til að ala upp börn sín og hafa hag þeirra að leiðarljósi.

Þar að auki tók Ólöf fram að í nágrannalöndunum væri sambærilega löggjöf ekki að finna. „Rótin hjá okkur er að vernda íslenska tungu enda erum við svo lítið málsvæði. Mér finnst að við eigum að gera það. En mannanöfn eru kannski ekki lykilatriði,“ sagði Ólöf.