Þriðjungur frumvarpa frá ríkisstjórninni dagar uppi

Alls voru samþykkt 90 stjórnarfrumvörp á nýyfirstöðnu þingi, eða 73 prósent þeirra 120 frumvarpa sem ríkisstjórnin lagði fram. Það þýðir að þriðjungur frumvarpa frá ríkisstjórninni dagar uppi og þarf að leggja þau fram að nýju í haust eigi þau að fást samþykkt.

Staðan er enn verri þegar litið er til allra lagafrumvarpa, það er að segja bæði stjórnarfrumvarpa og þeirra sem þingmenn leggja fram. Alls voru lögð fram 207 lagafrumvörp og 105 þeirra urðu að lögum. Það þýðir að rétt um helmingur frumvarpa nær í gegn, hinn helmingurinn dagar uppi.

Á síðustu dögum þingsins runnu málin í gegn eins og á færibandi. Vikurnar þar á undan var hins vegar allt í lás og engin mál fóru í gegn, utan lög á verkfall Félags íslenskra hjúkrunarfræðinga og BHM.

Svo virðist sem betri líkur séu á því að þingsályktunartillögur nái í gegn, að því gefnu að þær komi frá ríkisstjórninni. Ráðherrar lögðu fram 19 þingsályktunartillögur og 16 þeirra voru samþykktar. Af þeim fjórum þingsályktunartillögum stjórnarinnar sem ekki urðu að lögum eru tvær ættaðar frá utanríkisráðherra: Áætlun um alþjóðlega þróunarsamvinnu Íslands 2016-2019 (Þróunarsamvinnustofnun) og Þjóðaröryggisstefna fyrir Ísland. Að auki er það tillaga umhverfis- og auðlindaráðherra um Landsskipulagsstefnu 2015-2026 og fjögurra ára samgönguáætlun innanríkisráðherra fyrir árin 2015 til 2018.

Þegar litið er til allra þingsályktunartillagna sem fram eru lagðar er hlutfallið hins vegar mun verra og ljóst að það eykur líkurnar umtalsvert á því að slíkar tillögur séu samþykktar að þær komi frá ráðherra. Alls voru lagðar fram 115 þingsályktunartillögur en aðeins 22 samþykktar. Það þýðir að af 96 þingsályktunartillögum sem óbreyttir þingmenn lögðu fram voru aðeins sjö samþykktar.

Þó erfitt sé að fullyrða hvað séu stór mál, er óhætt að segja að á meðal þeirra stærstu sem ekki fóru í gegn séu frumvörp félags- og húsnæðismálaráðherra um húsnæðismál; húsaleigulög, húsnæðisbætur og húsnæðissamvinnufélög.

Fjögur lagafrumvörp sem ráðherrar lögðu fram voru aldrei tekin á dagskrá og biðu því enn fyrstu umræðu þegar þingi var frestað. Þar af eru þrjú frá innanríkis- og dómsmálaráðherra: Frumvarp um aðgerðir gegn peningaþvætti og fjármögnun hryðjuverka, frumvarp um almannavarnir og frumvarp um tekjustofna sveitarfélaga. Þá var frumvarp heilbrigðisráðherra um staðgöngumæðrun í velgjörðarskyni ekki heldur tekið á dagskrá.