Uppsagnir á aukafundi bæjarstjórnar

Sveitarstjórnarmál Hafnarstjóra og sviðsstjóra skipulags og bygginga verður sagt upp störfum nái tillaga meirihluta bæjarstjórnar Hafnarfjarðar fram að ganga. Boðað var fyrir helgi til auka bæjarstjórnarfundar til að ræða breytingar á stjórnskipulagi Hafnarfjarðar. Samhliða stendur til að gefa bæjarstjóra sveitarfélagsins vald til að segja upp því fólki sem þurfi til að ná fram hagræðingu í rekstri.

Fundurinn hefst klukkan 9:15 og verður í beinni útsendingu á Vísi.

„Þetta eru svo geggjuð vinnubrögð að það varla hægt að hafa um þau nógu sterk orð. Með því að halda málinu algerlega leyndu og koma í veg fyrir upplýsta umræðu er í raun verið að afnema lýðræðið í bænum.

Án eðlilegrar kynningar og skoðanaskipta er útilokað að taka þetta fyrir,“ segir Sverrir Garðarsson, sitjandi bæjarfulltrúi Vinstri hreyfingarinnar – græns framboðs í Hafnarfirði.

Lagt er til í nýju stjórnskipulagi að verkefni íþrótta- og æskulýðsmála verði flutt til sem og verkefni skipulags og bygginga.

Einnig er lagt til að stjórn Hafnarfjarðarhafnar verði færð undir verksvið bæjarstjóra.

Þá leggur meirihlutinn til að bæjarstjóra verði falið að móta reglur um samskipti bæjarfulltrúa við starfsmenn bæjarins.

Í tillögu meirihlutans segir að ljóst sé að skipulagsbreytingum þessum fylgi tilfærslur og breytingar á mannahaldi. „Markmiðið skal vera að breyttar áherslur í rekstri skili aukinni framlegð. Bæjarstjóra er falið að framkvæma þær breytingar sem nauðsynlegar eru til að ná fram þeirri virkni sem nýtt stjórnskipulag krefst,“ segir í tillögunni.

Í síðustu viku var samþykkt tveggja mánaða sumarfrí í bæjarstjórn Hafnarfjarðar. Á þeim fundi fór Haraldur L. Haraldsson einnig yfir fjárhag bæjarins en þar kom fram að ítrekað hafi verið tekið lán fyrir afborgunum eldri lána síðustu tólf ár.

Sverrir vandar meirihlutanum ekki kveðjurnar. „Á bæjarstjórnarfundi fyrir örfáum dögum kom fram að meirihlutinn vildi ekki að bæjarstjórn kæmi saman fyrr en í september. En nú dettur þeim í hug að skjóta á sérstökum neyðarfundi til að breyta sjálfri stjórnskipan bæjarins með aðeins tveggja sólarhringa fyrirvara. Þetta er svo galið að það tekur engu tali. Svona er ekki hægt að stjórna neinu bæjarfélagi. Það hljóta allir að sjá, hvar í flokki sem þeir standa.“