Bærinn blandi sér ekki í geldingu villikatta

„Heilbrigðiseftirlitið hefur ekki séð gögn sem renna stoðum undir fjölda, bjargarleysi þeirra eða skjólleysi úti í náttúrunni,“ segir í umsögn heilbrigðiseftirlitsins þar sem Hafnarfjarðarbæ er ráðlagt að taka ekki þátt í verkefni um geldingu villikatta.

Fréttablaðið sagði frá hugmyndum félagsins Villikatta 29. janúar síðastliðinn. Félagið vildi fá Hafnarfjarðabæ í samstarf við að halda fjölda villikatta í skefjum. Sú aðferðafræði að veiða kettina, gelda þá og sleppa aftur væri mannúðleg leið til að takast á við villikattastofna án þess að aflífa dýrin. „Lengi hefur íslenskt samfélag litið fram hjá vandamálum villikatta, eða litið á þá sem plágu,“ sagði í bréfi Villikatta til Hafnarfjarðarbæjar.

Villikettir sögðu enn fremur að aðferðin hefði gefist sérlega vel í öðrum löndum. „Við munum svo sjá til þess að skjól sé á svæðinu og sjálfboðaliðar séu til staðar sem fylgjast með matargjöfum,“ sögðu Villikettir.

Hafnarfjarðarbær leitaði álits heilbrigðiseftirlitsins sem í fyrrgreindri umsögn rekur stjórn dýraverndunarmála í landinu og skyldur sveitarfélaga í þeim efnum. Framkvæmd í þessum efnum heyri undir Matvælastofnun sem ekki hafi fjallað um þá aðferðafræði að gelda villikettina.

„Með vísun til ofanritaðs er ekki rétt að Hafnarfjarðarbær taki ábyrgð á þessum aðgerðum,“ segir í umsögn heilbrigðiseftirlitsins sem síðasta vetrardag var lögð fram til kynningar í umhverfis- og framkvæmdaráði Hafnarfjarðar.

Dýraverndunarfélag Hafnarfjarðar, sem var endurvakið nú í febrúar eftir sautján ára hlé, segir í umsögn til bæjarins það vera sína framtíðarsýn að hafa stjórn á „villikattasamfélögum í bænum“ með geldingaraðferðinni. Mikilvægt sé að virða líferni villikatta.

„Þeir eru bæjarfélaginu gagnlegir með því að halda burtu rottum og minkum og hafa fylgt okkur eins lengi og elstu menn muna,“ segir Dýraverndunarfélag Hafnarfjarðar um villiketti bæjarins.