Samningarnir gera notendum erfitt fyrir að flytja

Þar sem notendastýrð persónuleg aðstoð (NPA) er fjármögnuð að 80 prósentum af sveitarfélögum og 20 prósentum af ríkinu eru notendur þjónustunnar óöruggir um hvað verður um þjónustusamninga sína ef þeir vildu flytja milli sveitarfélaga.

Inga Björk Bjarnadóttir er nemi í listfræði við Háskóla Íslands. Hún er með lögheimili í Borgarnesi og NPA-samning. „Ég er enn í námi svo ég má hafa lögheimili í Borgarnesi,“ segir Inga en hún veit ekki hvað tekur við ef hún fengi vinnu í Reykjavík eða öðrum landshluta að loknu námi.

Eins og Fréttablaðið hefur fjallað um var löggildingu á NPA-samningum við fatlað fólk frestað um tvö ár og verkefnið því enn á tilraunastigi. „Við höfum ekki getað bætt við nýjum samningum,“ segir Björk Vilhelmsdóttir, formaður velferðarráðs Reykjavíkurborgar.

„Eins og stendur er því erfitt fyrir fólk að flytja milli bæjarfélaga, á meðan þetta er enn tilraunaverkefni þá fellur NPA-samningurinn niður við flutning nema Alþingi ákveði að lögfesta verkefnið fyrr.“ Björk segir að hún reikni ekki með að það verði bið eftir nýjum samningi við búferlaflutninga ef NPA verður lögfest. „Þá er þetta komið í lög og þá skapast réttur til þjónustunnar.“ Hún ítrekar að það sé vilji hjá Reykjavíkurborg til að lögfesta NPA.

Sjá einnig: Segir stöðu mála í dag vera lögleysu

Eygló Harðardóttir félagsmálaráðherra tekur undir það að fullur vilji sé til þess að binda NPA-þjónustu í lög og segir frumvarp sem liggur fyrir á Alþingi í dag miða við að það gerist fyrir árslok 2016. Hún segir ástæðu þess að lagasetningu hafi verið frestað ekki síst vera þá að nauðsynlegt sé að fá lengri tíma og aukna reynslu til að undirbúa innleiðingu vegna svo viðamikils verkefnis á landsvísu. Hún segir gerð nýrra samninga velta á því viðbótarfjármagni sem kann að vera til ráðstöfunar á árinu 2015 og fjármagni á fjárlögum 2016 sem og ákvörðun einstakra sveitarfélaga.

Þór Þórarinsson hjá velferðarráðuneytinu segir ekki öruggt að notendur NPA geti flutt samningana milli sveitarfélaga þó svo að þjónustan verði bundin í lög. „Það væri kannski eðlilegast að það gerðist með þeim hætti en það er ekki hægt að ganga út frá því sem vísu þar sem hvert þjónustusvæði tekur ákvörðun um það.“ Hann segist þó vonast til að einhverjir nýir samningar bætist við á árinu.

„Það gætu komið inn 10 nýir samningar,“ segir hann. „Við viljum reyna að ná góðri dreifingu um allt land en eðlilega eru flestir á höfuðborgarsvæðinu þar sem þörfin er mest þar.“