Umboðsmaður krefur Sigmundi Davíð svara

Í kjölfar álits umboðsmanns á samskiptum Hönnu Birnu Kristjánsdóttur þáverandi innanríkisráðherra og Stefáns Eiríkssonar þáverandi lögreglustjóra, sendi umboðsmaður Alþingis Sigmundi Davíð Gunnlaugssyni forsætisráðherra bréf. Í bréfinu spyr umboðsmaður sérstaklega út í samþykkt siðareglna ráðherra, framkvæmd laga og reglna um skyldu til að skrá formleg samskipti og fundi og stöðu aðstoðarmanna ráðherra að lögum og útgáfu leiðbeinandi erindisbréfs fyrir aðstoðrmenn.

Umboðsmaður telur í bréfinu að siðareglur, sem ríkisstjórn Jóhönnu Sigurðardóttur setti sér, gildi um núverandi ríkisstjórn. Til þess hefði ríkisstjórnin öll þurft að samþykkja reglurnar sem slíkar. Í svari sem Sigmundur hafði sent umboðsmanni sagði hins vegar að birtar siðareglur gildi þar til þeim sé eytt. Umboðsmaður telur þar af leiðandi að siðareglurnar hafi ekki getað gilt um samskipti innanríkisráðherra og lögreglustjórans.

Þá telur umboðsmaður að huga þurfi að reglum um skráningu formlegra samskipta í Stjórnarráðinu og framkvæmd þeirra. Er þar vísað til þess að samskipti ráðherra við lögreglustjórans hafi verið skráningarskyld en þeirri skyldu ekki sinnt. Umboðsmaður telur reglurnar ekki skýrar og tilefni kunni að vera til endurskoðunar á þeim.

Skoða þarf leiðbeiningar fyrir aðstoðarmenn

Að endingu telur umboðsmaður Alþingis að tilefni sé til að endurskoða leiðbeiningar fyrir aðstoðarmenn ráðherra, einkum með það að markmiði að tryggja aðgreiningu á milli hlutverks ráðherra með hliðsjón af þeim verkefnum sem fela má aðstoðarmönnum.

Mögulega þurfi að koma fram afstaða til þess hvort og hvernig aðstoðarmenn megi haga beinum samskiptum sínum við forstöðumenn og starfsmenn undirstofnana og um heimildir þeirra til að fá aðgang að gögnum um einstök stjórnsýslumál.

Umboðsmaður óskar eftir svörum ráðherra, fyrir 1. september 2015, um hvort ábendingar hans verði ráðuneytinu tilefni til viðbragða og þá hvaða. Hann muni síðan taka afstöðu til þess hvort hann taki þessi atriði til frekari athugunar.