Veitti Guðrúnu Birnu á Grund viðurkenningu

Öldrunarráð Íslands veitti í dag Guðrúnu Birnu Gísladóttur, forstjóra dvalar- og hjúkrunarheimilisins Grundar í Reykjavík, viðurkenningu ráðsins 2015 fyrir langt og óeigingjarnt ævistarf að málefnum aldraðra.

Í tilkynningu frá Öldrunarráði segir að Guðrún Birna hafi allan sinn starfsferil starfað á Grund og sé líklega eini forstjóri landsins sem sé fæddur og alinn upp á elliheimili. „Grund var stofnuð af afa hennar, Sigurbirni Gíslasyni, og fleirum árið 1922. Faðir hennar, Gísli Sigurbjörnsson tók við af föður sínum og stýrði Grund í rumlega 60 ár, eða allt þar til Guðrún tók við starfi forstjóra árið 1994. Guðrún hafði þá starfað í rúm 30 ár á Grund við hlið foreldra sinna.

Dvalarheimilið Ás í Hveragerði, sem tók til starfa árð 1952, hefur einnig verið órjúfanlegur þáttur í ævistarfi Guðrúnar auk hjúkrunarheimilisins Markar í Reykjavík sem Grund tók við árið 2010.

Guðrún Birna hefur allan sinn starfsferil látið sér annt um hagsmuni og velferð aldraðra og með viðurkenningu Öldrunarráðs Íslands í dag eru þau störf í meira en hálfa öld þökkuð af alúð,“ segir í tilkynningu frá ráðinu.

Öldrunarráð Íslands eru regnhlífasamtök þeirra sem starfa að hagsmunum aldraðra hér á land.