Grindavíkurbær: Hægt að eignast hluti úr búningsklefa sundlaugarinnar

Áhugasamir geta nálgast blöndunartæki, vaska, klósett, skápa, hillur og fleira endurgjaldslaust eða gegn vægu gjaldi í sundmiðstöð Grindavíkurbæjar á föstudaginn.

Í frétt á heimasíðu bæjarins segir að til standi að flytja búningsaðstöðu fyrir sundmiðstöð yfir í ný íþróttamannvirki á næstu dögum og því hafi verið ákveðið að bjóða fólki upp á þetta.

Hægt verður að nálgast hlutina í húsnæði sundlaugarinnar á föstudaginn milli klukkan 14:30 og 16:30.

Í fréttinni segir að fyrstir koma, fyrstir fá. „Ætlast er til þess að fólk komi með sín eigin verkfæri til að fjarlægja hlutina. Einungis má taka þá hluti sem eru merktir greinilega með lit. Litinn má svo þrífa af við heimkomu.

Engin ábyrgð er tekin á hlutunum og þá sérstaklega blöndunartækjum, mælst er með því að fólk láti fagmann setja tækin upp á nýjan leik.“