Raforkuöryggi Vestfjarða verið stórbætt

Raforkuöryggi á Vestfjörðum hefur stóraukist með nýrri varaaflstöð í Bolungarvík. Stöðin var tekin formlega í notkun í gær og er það stór áfangi í átaki Landsnets til að efla afhendingaröryggi raforku í fjórðungnum.

Afkastageta stöðvarinnar samsvarar orkunotkun allra norðanverðra Vestfjarða, en uppsett afl hennar verður um 10,8 MW frá sex dísilvélum. Sérstaða hennar, raunar á heimsvísu, er að hér er sett upp varaafl fyrir heilan landshluta en til þessa hafa varaaflstöðvar hér á landi eingöngu verið tengdar einum notanda eða einu bæjarfélagi.

Landsnet hefur lengi leitað leiða til að auka afhendingaröryggi raforku á Vestfjörðum. Forsendan fyrir því að úrbætur auki rekstraröryggi á Vestfjörðum er hins vegar svonefnt snjallnet – tæknibúnaður sem Landsnet hefur sett upp víða í Vestfjarðakerfinu og tengdur er saman í öflugu fjarskiptakerfi. Fyrir tíma snjallnetsins var viðbragðstími vart undir hálfri klukkustund á norðanverðum Vestfjörðum, s.s. á Ísafirði og í Bolungarvík, en eftirleiðis munu almennir notendur á svæðinu verða komnir með rafmagn að nýju innan tveggja mínútna.

Þórður Guðmundsson, fyrrverandi forstjóri Landsnets, sagði við opnunarathöfn í Bolungarvík í gær að nú væri fram undan hjá Landsneti að skoða hvernig best mætti styrkja afhendingaröryggi raforku á sunnanverðu svæðinu og tengingu norður- og suðursvæðisins. Að mati Landsnets er aukin orkuframleiðsla innan fjórðungsins hins vegar forsenda þess að hægt verði að tryggja ásættanlegt raforkuöryggi Vestfjarða til framtíðar.

Kristján Haraldsson, orkubússtjóri hjá Orkubúi Vestfjarða, segir ljóst að varaaflstöðvarnar á Ísafirði og í Bolungarvík og ný tækni sem felst í snjallnetinu sé risastórt skref fram á við. „Það má segja að langvarandi rafmagnsleysi á norðanverðum Vestfjörðum heyri nú sögunni til.“

Verkið tók rúm tvö ár og kostaði um 1,5 milljarða króna en alls hefur Landsnet fjárfest fyrir rúma þrjá milljarða í bættu orkuöryggi vestra á liðnum árum.

Nýlundan byggist á öflugum fjarskiptum

• Landsnet hefur lengi leitað leiða til að auka afhendingaröryggi raforku á Vestfjörðum. Fyrr hafði nýtt tengivirki á Ísafirði risið, rafmagnslínur í svæðiskerfinu vestra verið endurnýjaðar og endurbættar og jarðstrengur lagður milli Ísafjarðar og Bolungarvíkur.
  
  
• Forsendan fyrir því að þessar úrbætur auki rekstraröryggi á Vestfjörðum er hins vegar svonefnt snjallnet.
  
  
• Verði truflun, sem hefur það í för með sér að orkuvinnsla innan svæðisins nægir ekki til að sinna aflþörfinni, þá leysir snjallnetsbúnaðurinn út allt rjúfanlegt álag á svæðinu og ræsir um leið varavélar aflstöðvarinnar í Bolungarvík og lágmarkar þannig umfang truflunarinnar hjá íbúum Vestfjarða og öðrum raforkunotendum.