Unglingsstúlka varð fárveik af landadrykkju

Unglingsstúlka fárveiktist um helgina eftir að hafa drukkið landa. Tilkynning um atvikið barst lögreglunni á Suðurnesjum seint á laugardagskvöld en stúlkan og piltur sem var með henni höfðu keypt landann fyrir utan skemmtistað í umdæmi lögreglunnar.

Í tilkynningu frá lögreglunni á Suðurnesjum segir:

„Skömmu eftir að stúlkan hafði innbyrt eitthvað af brugginu varð hún fárveik, kastaði upp og meðvitund hennar skertist. Henni hrakaði svo og var hún flutt með sjúkrabifreið í lögreglufylgd  á Landspítalann  í Reykjavík. Ástand hennar var orðið stöðugt eftir skamma dvöl á spítalanum.kau

Lögregla hafði samband við forráðamenn stúlkunnar og piltsins og einnig var málið tilkynnt til barnaverndarnefndar. Málið er í rannsókn.

Lögregla varar sem fyrr við kaupum á heimabrugguðu áfengi. Neysla þess getur haft alvarlegar afleiðingar eins og dæmi hafa sannað.“