Ísland breytti atkvæði sínu hjá Sameinuðu þjóðunum

Fastanefnd Íslands hjá Sameinuðu þjóðunum sat hjá í atkvæðagreiðslu um sáttmála um alþjóðlegt kjarnorkuvopnabann. Í byrjun nóvember hafði sendinefnd Íslands greitt atkvæði gegn samkomulaginu og var eitt 29 ríkja sem gerði slíkt.

Að þessu sinni voru það 133 ríki sem greiddu atkvæði með samkomulaginu, 23 kusu gegn og 28 sátu hjá.

Bretland, Bandaríkin, Frakkland, Rússland og Kína kusu ekki með samkomulaginu.

Í svari utanríkisráðuneytisins við fyrirspurn Fréttablaðsins um samkomulagið og afstöðu Íslands segir þar að ekki er deilt um lokatakmarkið sem er kjarnorkuvopnalaus heimur. Það hafi komið fram í atkvæðaskýringu Íslands og kemur heim og saman við afstöðu Gunnars Braga Sveinssonar utanríkisráðherra. „Við viljum ekki sjá þessi vopn og við viljum að þeim sé öllum eytt og ekki búin til ný,“ sagði Gunnar Bragi í viðtali í Reykjavík síðdegis á Bylgjunni þann 10. nóvember síðastliðinn.

Þá kemur skýrt fram í nýrri þjóðaröryggisstefnu sem utanríkisráðherra hefur lagt fram á Alþingi að Ísland skuli vera friðlýst fyrir kjarnorkuvopnum.

Í svari ráðuneytisins kemur fram að ástæða þess að Ísland sat hjá ásamt fleiri ríkjum er að til staðar er samningur sem bannar útbreiðslu kjarnorkuvopna, svokallaður NPT-samningur. Mat ríkjahópsins sem sat hjá er að nýtt samkomulag kynni að grafa undan NPT-samningnum.

„Sá samningur er vissulega ekki gallalaus og málamiðlun á sínum tíma. Hann er hins vegar sá samningur og það ferli sem hin opinberu fimm kjarnaveldi eru aðilar að, sem er auðvitað frumforsenda þess að árangur náist,“ segir í svari ráðuneytisins.