Illugi skrifar reiðhjólaþjófi: „Dóttir mín á þetta hjól, ekki þú“

„Það býr nú í þér heiðarleg taug, er það ekki?“ skrifar Illugi Jökulsson rithöfundur í bloggfærslu á Eyjunni sem ber heitið Kæri þjófur. Hann skrifar til hverrar þeirrar manneskju sem stal reiðhjóli dóttur hans, Veru Illugadóttur fréttamanns, nú á dögunum.

„Fyrir tæpum sólarhring eða svo stalst þú þessu hjóli við Leifsgötu tíu í miðborg Reykjavíkur,“ skrifar Illugi og birtir mynd af hjólinu, sem er nokkuð auðþekkjanlegt. „Það er hún Vera dóttir mín sem á þetta hjól, ekki þú. Það var ekki hugsun hennar að vinna sleitulaust í lengri tíma svo þú gætir eignast hjól. Né heldur hefur hún nostrað við það síðan, svo þú getir verið að sperra þig á því á götunum.“

Að sögn Illuga þykir Veru mjög vænt um hjólið og saknar þess. Hann biðlar til þjófsins að skila því einfaldlega aftur til eiganda þess.

„Þú gætir skutlast með það aftur á Leifsgötu, eða látið annaðhvort okkar vita hvar hægt væri að nálgast það,“ skrifar Illugi. „Við erum bæði auðfinnanlega á Facebook, til dæmis. Gerðu þetta nú – þetta er ekki þitt hjól.“