Fangar á Litla-Hrauni mótmæla

Fangar á Litla-Hrauni hafa nú hafið undirskriftarsöfnun til að mótmæla lokun Barnakots um helgar. Um er að ræða aðstöðu fyrir börn svo þau þurfi ekki að fara inn í sjálft fangelsið en hún hefur verið opin í tæpt ár.

Föngum barst tilkynning um ákvörðun þessa nú um helgina. Þeir segjast ekki hafa fengið ástæðu fyrir breytingunum en segja að um skilningsleysi stjórnenda sé að ræða. „Góð samskipti við fjölskyldur og börn er lykillinn að betrun og harmar Afstaða þessa ákvörðun stjórnenda Litla-Hrauns og teljum þetta vera mikil afturför,“ segir á Facebook-síðu Afstöðu, félags fanga. Margrét Frímannsdóttir, forstöðumaður fangelsisins, segir í samtali við RÚV að þessi ákvörðun hafi verið tekin í sparnaðarskyni vegna niðurskurðar.

Afstaða segir Barnakot hafa reynst föngum afar vel. Úrræðið hafi verið gífurlega vel heppnar og krakkarnir hafi verið mjög spenntir fyrir þessari aðstöðu. „Það getur oft reynst erfitt fyrir fanga að fá t.d fyrrverandi maka til þess að koma í heimsókn með barn eða börn, en að biðja makann um að taka frí í vinnunni á virkum degi myndi hugsanlega koma í veg fyrir að makinn kæmi með barnið í heimsókn,“ segir í tilkynningunni en Barnakot verður frá og með 11.júlí opið alla virka daga, en lokað um helgar og á hátíðardögum.

BARNAKOTI, heimsóknaraðstöðu fyrir börn lokað á Litla Hrauni um helgar.Fangar á Litla Hrauni safna nú undirskriftum til...

Posted by Afstaða - Til ábyrgðar on 8. júlí 2015