Skilorð fyrir að brjóta gegn tólf ára stúlku

Rúmlega fertugur karlmaður var í dag sakfelldur fyrir kynferðisbrot gegn systurdóttur sinni. Ákvörðun refsingar var frestað og fellur hún niður haldi hann skilorð í tvö ár.

Manninum var gert að sök að hafa í nóvember 2012 snert brjóst og rass stúlkunnar utan klæða og að hafa strokið milli brjósta hennar innan klæða. Stúlkan er fædd árið 2000 og var tólf ára gömul þegar atvikið átti sér stað. Maðurinn var sakfelldur fyrir þessa hluti í Héraðdómi Suðurlands í nóvember í fyrra en áfrýjaði málinu til Hæstaréttar.

Maðurinn neitaði ávallt sök í málinu. Hann viðurkenndi í skýrslutöku hjá lögreglu að hafa strokið yfir og klipið í brjóst stelpunnar utan klæða og spurt hana að því hvað þetta væri. Það hafi hins vegar verið óvart og ekki af kynferðislegum toga. Í dómi Hæstaréttar kemur fram sannanir séu fyrir því að brotið hafi átt sér stað en hins vegar virðast ekki vera fyrir því nægar sannanir að maðurinn hafi snert rass stúlkunnar eða farið inn á hana. Var honum ekki dæmd refsing fyrir þær ásakanir.

Málið barst til lögreglunnar á Selfossi frá velferðarþjónustu og var óskað eftir rannsókn á því. Í framburði brotaþola segir hún að hún haldi að málið sé „allt einn stór misskilningur.“ Fyrir dómi sagði hún að henni liði ekki illa vegna atburðarins og síðar óskaði hún eftir því að gefa skýrslu aftur fyrir dómi til að ítreka að atvikið hafi ekki haft nein áhrif á hana. Taldi hún ekki rétt að sakfella í málinu.

Að auki var maðurinn dæmdur til að greiða hluta sakarkostnaðar en hann greiðist að hluta til úr ríkissjóði.