Bryndís leitar ungu mannanna sem héldu á henni hita eftir alvarlegt bílslys

Fyrirsætan Bryndís Gyða Michelsen lenti í alvarlegu bílslysi vorið 2007. Reykjavíkurmærin 24 ára var farþegi í bíl í Öræfasveit, nærri sveitabænum Kvískeri, þegar bíllinn fór útaf veginum. Bryndís Gyða fékk lífshættulega innvortis áverka, ýmis brot á fótum og fór einnig úr mjaðmalið.

Tveir strákar komu Bryndísi til bjargar fyrir átta árum og leitar Bryndís þeirra. Hún segist í samtali við Vísi hafa fengið nokkrar ábendingar í kjölfar þess að hún birti færslu um efnið á Facebook í gær. Hún hafi þó ekki enn fundið strákana sem í dag eru vafalítið ungir menn.

„Það er bara verst að það er svo langt síðan. Ég átta mig ekki á því hvað þeir voru gamlir á þessum tíma. Ég var bara 15 ára krakki í tíunda bekk á þessum tíma og þetta er í mikilli móðu. Þeir hafa verið eitthvað eldri en ég og það hefur alltaf verið fast í mér að þeir væru frá Selfossi en það þarf ekki að vera rétt.“

Hún segir í samtali við Vísi hafa leitað til lögreglu í þeirri von um að þar væri að finna nöfn drengjanna. Svo var því miður ekki.

Bryndís lýsir því í færslunni hvernig hún hafi legið á veginum og ekki getað hreyft sig. Henni hafi verið kalt og hún gleymi því aldrei hve þyrst hún var.

„Einhverntímann eftir að ég rankaði við mér stoppaði bíll og ef ég man rétt voru a.m.k. tveir strákar, ungir, sem stigu út úr bílnum til að athuga hvað væri í gangi. Þeir sáu strax að ég var slösuð og fundu hvað mér var kalt og byrjuðu þá að taka sængurnar sínar úr bílnum og setja utan um mig til að reyna að halda á mér hita,“ segir Bryndís í færslunni.

Þeir voru svo hjá Bryndísi alveg þangað til að sjúkrabíllinn kom. Þessara manna leitar Bryndís Gyða í dag af þeirri einföldu ástæðu að hún vill þakka þeim fyrir hjálpina. Hvetur hún fólk til að hjálpa sér við leitina með því að deila á Facebook.

Nú langar mig að láta reyna á mátt Facebook. Þann 27 maí árið 2007 breyttist ýmislegt í mínu lífi. Ég var farþegi í bíl...

Posted by Bryndis Gyda Michelsen on Tuesday, June 23, 2015