„Við erum að undirbúa útgáfu á næstu EP-plötu og njótum liðsinnis 66°Norður við það. Þetta er nýtt verkefni unnið í samstarfi við 66°Norður og verður gert á nýstárlegan hátt,“ segir tónlistarmaðurinn Logi Pedro Stefánsson. Hann getur þó ekki farið nánar ofan í samvinnuverkefni hljómsveitar sinnar, Young Karin, og fataframleiðandans.
Young Karin hefur í nógu að snúast um þessar mundir og er á leið til Danmerkur að spila á Hróarskeldu. „Við erum mjög spennt og höfum verið að undirbúa þá tónleika frekar lengi. Við erum með fullt af flottu stöffi í ofninum,“ segir Logi Pedro en hann myndar sveitina ásamt söngkonunni Karin Sveinsdóttur.
Young Karin ætlar ásamt hljómsveitinni Vök að halda eins konar kveðjutónleika undir yfirskriftinni Húrraskelda á Húrra í kvöld, en báðar sveitirnar spila á Hróarskeldu. „Við ætlum að frumflytja eitthvað af nýju efni í kvöld geri ég ráð fyrir og líka á Hróarskeldu,“ segir Logi Pedro.
Hann er að fara í fyrsta sinn á hátíðina og er orðinn spenntur. „Við verðum þarna yfir alla hátíðina og erum mjög spennt. Ég er samt pínu kvíðinn því ég er svo félagsfælinn og er að fara að vera þarna í viku. Þetta verður samt geggjað,“ bætir Logi Pedro við léttur í lundu.
Ásamt Young Karin og Vök eru hljómsveitirnar The Vintage Caravan og Kippi Kaninus framlög Íslands á Hróarskelduhátíðinni í ár sem fram fer dagana 27. júní til 4. júlí. Fleiri þekkt nöfn koma fram á hátíðinni í ár eins og Muse, Pharrell Williams og Sir Paul McCartney.
Undirbúa útgáfu á nýju efni með fatarisa
