Þjóðaratkvæðagreiðslan skrípaleikur

„Ekkert ríki, sama hversu voldugt, getur leyft sér að hafa alþjóðalög að engu og komast hjá því að taka afleiðingunum.“ Þetta segir Stuart Gill, sendiherra Bretlands á Íslandi, í aðsendri grein í Fréttablaðinu í dag. Þar fjallar Gill um innlimun Krímskaga í Rússland og þá auknu öryggishættu sem stafar af auknum umsvifum Rússa í Evrópu.

„Hin svokallaða þjóðaratkvæðagreiðsla á Krím, sem var efnt til í flýti á tveimur vikum, var skrípaleikur. Engir óháðir, alþjóðlegir eftirlitsmenn fylgdust með framkvæmdinni. Þess í stað sáu rússneskir hermenn – „litlu grænu mennirnir“ eins og heimamenn nefndu þá – um að hrinda vilja Vladimírs Pútín í framkvæmd,“ ritar Gill.

Sendiherra segir augljóst að rússneskumælandi íbúar á Krím hafi aldrei verið í neinni hættu né annars staðar í Úkraínu. Pútín hefur réttlætt stefnu Rússa með vísan til öryggis rússneskumælandi einstaklinga á svæðinu.

Gill segir alþjóðasamfélagið ekki mega sætta sig við innlimun Krím í Rússland. Þetta hafi verið ólögleg aðgerð. Krím sé áfram hernumið land og þeir íbúar sem minnst mega sín líði fyrir gerræðisstefnu Rússa.

„Það er til leið út úr þessu. Rússar geta enn kallað herlið sitt til baka frá Krím og Austur-Úkraínu, virt alþjóðlegar skuldbindingar sínar samkvæmt Minsk-samningunum og leyft úkraínsku þjóðinni að ákveða sjálf framtíð sína,“ ritar Gill og lýkur síðan grein sinni á þessum orðum:

„En uns þetta gerist munum við ekki leiða hjá okkur það sem gerðist á Krím. Afstaða okkar er skýr: Innlimun Krím í Rússland er ekki hægt að samþykkja og við munum áfram standa vörð um gildi okkar með þvingunaraðgerðum sem refsa þeim sem ábyrgir eru fyrir að slíta Krím frá Úkraínu.“