Biðlar til þjófanna að skila köttunum

Bíræfnir þjófar náðu að stela fjórum hreinræktuðum Bengal köttum í Ölfusi í gær eða í nótt. Eigandinn saknar þeirra sárt og biðlar til þjófanna að skila þeim.

Ólafur Njálsson hefur í yfir tvo áratugi búið á Nátthaga í Ölfusi. Þar ræktar meðal annars Bengal ketti. Ólafur hefur undanfarið verið með tíu ketti en hluti þeirra hefur verið í skemmu á svæðinu. Um hálf tvö leytið í nótt áttaði Ólafur sig á því að brotist hafði verið þar inn og fjórum köttum rænt. Hann telur þjófana vera fleiri en einn og að þeir hafi lagt bíl sínum í innkeyrslunni á meðan að þeir sóttu kettina. Djúp för í snjónum benda til þess að þeir hafi fest bíl sinn þar. „ Það er eins og þetta hafi verið tvær manneskjur. Konan hefur farið inn í skemmu að brjótast inn en karlinn náð í allar skóflur sem hann fann hérna,“ segir Ólafur. 

Ólafur segir með ólíkindum að þjófarnir hafi náð öðru fressinu þar sem kötturinn er mjög styggur. „ Það er engu líkara en að þau hafi verið með svæfingalyf því að þau réðu við kettina og komu þeim í box. Stygga fressið er þannig að þú þarft að veiða það með lagni inn í búrið, “ segir Ólafur. 

Hann segir verðmæti kattanna um tvær milljónir en þeir eru örmerktir og því erfitt að selja þá. Læðurnar eru geldar og því ekki hægt að nota þær til ræktunar.  Hann saknar kattanna sárt og biðlar til þjófanna að skila þeim. „ Ég er alveg tilbúinn að tala við þetta blessaða fólk ef það vill skila þeim sko. Löggan þarf ekkert að vera viðstödd. Ég get alveg haldið því leyndu hverjir þetta voru, “ segir Ólafur.