Aðalsteina og Gunnhildur lausar úr fangelsi

Aðalsteinu Líf Kjartansdóttur og Gunnhildi Svövu Guðmundsdóttur hefur verið veitt reynslulausn. Þetta hefur Vísir hefur staðfestum heimildum. Stúlkurnar voru framseldar til Íslands frá Tékklandi í lok nóvember á síðasta ári og hafa síðan þá setið í Kópavogsfangelsi. DV greindi fyrst frá málinu í morgun og hafði eftir eigin heimildum.

Stúlkurnar voru handteknar á Vaclav Havel-flugvellinum í Prag, höfuðborg Tékklands níunda nóvember 2012, á leið sinni frá Brasilíu. Þá voru þær átján ára gamlar. Í fórum þeirra fundust þrjú kíló af kókaíni, sem eru um sextíu þúsund söluskammtar samkvæmt tékkneskum dómstólum. 

Aðalsteina og Gunnhildur voru dæmdar til sjö og sjö og hálfs árs fangelsisvistar fyrir smyglið en ástæða þess að önnur stúlknanna fékk þyngri dóm var sú að meira magn af kókaíni fannst í tösku hennar. Dómurinn var síðar mildaður í fjögur og hálft ár. 

Þær komu til Íslands í lok nóvembermánaðar að loknu framsalsferli sem hófst í júnímánuði. Stúlkurnar voru framseldar til Íslands á grundvelli Evrópusamnings um framsal fanga.