Kona Eiðs Smára á von á þeirra fjórða barni

Eiður Smári Guðjohnsen er í landsliðshópi Íslands á móti Kasakstan sem tilkynntur var í dag en hann er að koma aftur inn í landsliðið eftir sextán mánaða fjarveru.

Það var þó ekki öruggt að Eiður Smári gæti gefið kost á sér í verkefnið því kona hans Ragnhildur Sveinsdóttir á von á sér.

"Hann gaf kost á þér í þetta verkefni og við erum mjög ánægðir með það. Það var ekkert sjálfgefið að hann myndi gefa kost á sér, þar sem frúin hans á von á barni," sagði Heimir Hallgrímsson, landsliðsþjálfari Íslands á blaðamannafundinum í dag.

Eiður Smári og Ragnhildur eiga fyrir synina Sveinn Aron, Andra Lucas og Daníel Tristan. Sveinn Aron er fastamaður í 17 ára landsliði Íslands og Andri Lucas var í sigurliði HK á N1 mótinu á Akureyri síðasta sumar.

Eiður Smári hefur leikið 78 landsleiki fyrir Ísland og er markahæsti leikmaður landsliðsins frá upphafi með 24 mörk.