Engir peningar í viðamikil verkefni

StjórnsýslaKvikmyndasjóður Íslands er núna í janúar strax orðinn tómur hvað varðar vilyrði um framleiðslustyrki vegna mynda sem á að frumsýna á næsta ári. „Það er rétt, það eru ekki lausir peningar í viðamikil framleiðsluverkefni,“ segir Laufey Guðjónsdóttir, forstöðumaður Kvikmyndamiðstöðvar Íslands, og bætir við að staðan sé óvenjuleg á þessum árstíma.

Vilyrði um styrk er forsenda frekari fjármögnunar verkefna og því afar mikilvæg. Aðeins þrjár kvikmyndir hafa fengið vilyrði fyrir næsta ár, eða Svanurinn í leikstjórn Ásu Helgu Hjörleifsdóttur, Undir halastjörnu í leikstjórn Ara Alexanders og Andið eðlilega eftir Ísoldu Uggadóttur. „Til að halda greininni á floti þarf að vera með að minnsta kosti þrjár myndir sem eru fullframleiddar með öllu sem tilheyrir stórum myndum. Við höfum varla haldið því í rauninni. Þetta er rosalega þröng staða og hún er búin að vera þröng lengi.“

Enn eru þó peningar til í sjóðnum fyrir handrita- og þróunarstyrkjum. Þeir nema tveimur til sex milljónum króna fyrir hvert verkefni.

„Við gætum ekki gert sögulega stórmynd, búningamynd sem gerist í fortíðinni. Þær eru of dýrar. Allar myndir þurfa að gerast í nútímanum og helst sem næst Reykjavík.“

Laufey segir að lágar styrkveitingar til kvikmynda frá árinu 2010 hafi komið illa við íslenska kvikmyndagerð. Samkvæmt henni var framlag ríkisins 700 milljónir króna 2010. Fimm árum og krónuhruni síðar sé upphæðin 750 milljónir. „Núna var aðeins bætt við, sem er þakkarvert en samt ekki nóg til að halda greininni á floti miðað við kostnaðinn.“ Laufey nefnir þó að tuttugu prósenta endurgreiðslur frá atvinnu- og nýsköpunarráðuneytinu, sem renna að hluta til íslenskra mynda, hjálpi til en þær komi samt ekki til nota fyrr en eftir að myndir eru tilbúnar.

Samkomulag kvikmyndagreinarinnar og ríkisins frá árinu 2011 um styrki til íslenskrar kvikmyndagerðar rennur út í lok þessa árs. „Það er byrjað að leggja drögin að því að gera nýtt samkomulag og ég á ekki von á öðru en að það verði góður „díalógur“ á milli stjórnvalda og greinarinnar með það. Það er svo mikið atriði, af því að fjármögnun í þessari grein tekur alltaf svo langan tíma, að hafa það til nokkurra ára í senn.“