Vodafone neitaði að afhenda gögn

Vodafone hefur ekki sent Persónuvernd gögn er varða skoðun Hafnarfjarðarkaupstaðar á símtalaskrám kjörinna fulltrúa bæjarins.

Þrír bæjarfulltrúar minnihlutans í bænum kvörtuðu til Persónuverndar þar sem þeir fara fram á að rannsaka það hvort embættismenn bæjarins hafi haft leyfi til þess að skoða símtalaskrár þeirra. Að þeirra sögn hafi bæjarstjóri tilkynnt skoðunina eftir á á fundi bæjarráðs.

Bára Mjöll Þórðardóttir, upplýsingafulltrúi Vodafone, segir það hafa skipt máli að vita hvar valdmörk Persónuverndar og Póst- og fjarskiptastofnunar liggja.

„Ekki lá skýrt fyrir hvar valdmörkin í umræddu máli lágu. Því óskaði Vodafone eftir því að Persónuvernd myndi taka afstöðu til þess hvort Persónuvernd eða Póst- og fjarskiptastofnun væri bær til að fjalla um málið. Þegar skorið hefur verið úr því hvar valdmörkin liggja mun Vodafone að sjálfsögðu afhenda umrædd gögn,“ segir Bára Mjöll.