Lánuðu liðsfélaga Katrínar til Ástralíu

Natasha Dowie, framherji Liverpool og enska landsliðsins í fótbolta, ætlar ekki að taka því rólega á meðan enska deildin er í fríi.

Íslenski miðjumaðurinn Katrín Ómarsdóttir spilar einnig með Liverpool-liðinu sem missti enska meistaratitilinn til Chelsea á síðasta tímabili eftir að hafa unnið hann tvö ár í röð á undan því.

Dowie er nú á leiðinni til Ástralíu þar sem hún verður á láni hjá Melbourne Victory liðinu næstu tvo mánuði.

Natasha Dowie er 27 ára gömul og skoraði 14 mörk fyrir Liverpool á síðasta tímabili. Hún mun klára ástralska tímabilið með Melbourne Victory áður en hún snýr aftur til Liverpool til að undir búa sig fyrir næsta tímabil.

„Ég hef alltaf verið áhugasöm um að spila erlendis og fá að upplifa öðruvísi fótbolta. Ég fagna því þessu tækifæri að fá að fara á láni," sagði Natasha Dowie við BBC.

Melbourne Victory liðið þarf vissulega á hjálp að halda en liðið er í neðsta sæti áströlsku deildarinnar eftir fimm töp í röð í upphafi tímabilsins. Það er ólíklegt að liðið komist í úrslitakeppninni sem þýðir að síðasti leikur Natasha Dowie ætti að koma í janúar.

Íslenska knattspyrnukonan Þóra Björg Helgadóttir fór svipaða leið og Natasha Dowie veturinn 2012-13 þegar hún var leikmaður sænska liðsins Malmö en fór á láni um veturinn til ástralska félagsins Western Sydney Wanderers.