Túrað um Evrópu með OMAM

„Það var einfaldlega magnað að spila fyrir svona rosalega marga á hverju kvöldi. Líkaminn er kannski kominn heim, en hausinn er líklega ekki væntanlegur til baka fyrr en um helgina,“ segir Katrina Mogensen, söngkona Mammút, sem fyrir andartaki sneri aftur eftir Evróputúr með Of Monsters And Men, þar sem Mammút sá um upphitun.

„Við spiluðum í fimmtán borgum, og það var mjög gaman að sjá hve OMAM eru rosalega stórt band, með rosalega mikinn og stóran aðdáendahóp,“ segir Katrina og kveður það sannarlega sérstaka upplifun að spila í Brussel daginn eftir hryðjuverkaárásina í París á föstudagskvöld, þar sem Bataclan-tónleikahöllin var hertekin og fjöldi fólks myrtur á miðjum tónleikum.

„Það kom vissulega til tals að hætta við tónleikana en svo var ákveðið að gera það ekki. Þessir tónleikar voru því eins og ég segi mjög óraunverulegir og stemningin þrúgandi, en einhvern veginn stútfull af ást,“ útskýrir Katrina og á erfitt með að lýsa þessari upplifun. „Við í Mammút áttum jafnframt að fara til Lúxemborgar og spila á festivali þar, en sú hátíð var blásin af vegna voðaverkanna, þetta er auðvitað hrikalegt,“ segir hún.

Katrina segir Mammút og Of Monsters and Men hafa náð verulega vel saman og það hafi verið frábær reynsla og einstök upplifun að fara þennan túr með þeim. „Ætli maður sé nokkuð alveg búinn að átta sig alveg á þessu og meðtaka allt það sem var að gerast? Maður er í einhvers konar búbblu á meðan á ferðalaginu stendur.“

Ný orka og innspýting með heim

Eftir dágóðan tíma saman um borð í einni rútu, segir Katrina ágætt að snúa aftur, en það sanni sig enn og aftur hve dýrmætt það er að ferðast með góðum vinum, sé ferðast svo náið og skellir upp úr. Nú séu þau komin heim í að minnsta kosti dágóðan tíma, enda plötusmíðar að fara á fullt og þau komi sannarlega innblásin til leiks.

„Við komum heim með mjög gott nesti, búin að birgja okkur upp fyrir veturinn og munum eyða honum í að semja nýtt efni fyrir plötuna sem kemur út í vor.“

Það er breski útgáfurisinn Bella Union sem hefur veg og vanda af útgáfunni. Aðspurð hvort pressa sé komin á þau frá aðdáendum um að fá nýtt efni svarar Katrina til: „Ætli það séum ekki við sjálf sem erum spenntust fyrir hvað kemur út úr þessu, við leyfum ferlinu einhvern veginn bara að gerast og reynum ekki að stjórna því of mikið, við tökum heilmikið úr þessum túr með okkur og blöndum við það sem við eigum fyrir. Eftirvæntingin er því okkar megin og spennan fyrir að sjá okkur sjálf og koma okkur á óvart,“ útskýrir hún glaðlega að lokum.