Ómar kominn í mark: Ferðin kostaði 115 krónur

Ómar Ragnarsson lauk í dag ferð sinni milli Akureyrar og Reykjavíkur. Ferðaðist Ómar á rafknúnu reiðhjóli en markmiðið ferðarinnar var að sýna fram á þá möguleika sem eru fyrir hendi hér á landi þegar kemur að rafknúnum farartækum. Kostaði hleðslan á hjólið hans Ómars aðeins 115 krónur.

Ómar ferðaðist um á sérhönnuðu hjóli sem Gísli Sigurgeirsson, rafeindarvirki, á heiðurinn af. Kostnaðurinn við það að knýja rafmagnshjól Ómars áfram var nánast enginn, aðeins 115 krónur.

„Ég er ánægðastur með að það hafi bara kostað 115 krónur af íslenskri orku að flytja einn mann með fullt af drasli á milli Akureyri og Reykjavíkur. Það er það sem stendur upp úr,“ sagði Ómar við þá sem tóku á móti honum við Umferðarmiðstöðina en Dagur B. Eggertsson, borgarstjóri, og Ragnheiður Elín Árnadóttur, iðnaðar- og viðskiptaráðherra voru meðal viðstaddra.

Gísli Gíslason, söluaðili Tesla á Íslandi, ferðaðist einnig hringinn í kringum landið á Tesla-bifreið svo að hægt væri að bera saman kostnaðinn við það að ferðast um landið á rafmagnsfarartækjum, allt frá hinu smæsta farartæki til hins stærsta.

„Það kostaði 3000 kr. rafmagnið að fara hringinn á TESLA Model S. Markmiðið var að sýna hvað það kostar að fara með minnsta og ódýrasta farartækið og hvað það kostar að fara á dýrasta og flottasta faratækinu.“

Markmið Ómars var að slá eitt af fimm Íslandsmetum og tókst honum það. Tilgangurinn með ferðinni var að sögn Ómars að sýna Íslendingum hvaða tækifæri eru fyrir hendi þegar kemur að rafknúnum farartækjum.

„Markmiðið var að sýna okkur Íslendingum hvaða möguleika við eigum fyrir börnina okkar og framtíð hugvits og tækni. Það var tilgangurinn með ferðinni.“