Arftaki Stones fundinn?

Everton er nálægt því að ganga frá kaupunum á argentíska miðverðinum Ramiro Funes Mori frá River Plate.

Samkvæmt frétt Telegraph flaug Mori til Englands í dag til að gangast undir læknisskoðun. Félögin hafa komist að samkomulagi um kaupverð og búið er að útvega Argentínumanninum atvinnuleyfi.

Miðvarðamál Everton hafa verið mikið í umræðunni að undanförnu en Englandsmeistarar Chelsea eru sem kunnugt er á höttunum eftir hinum efnilega John Stones og hafa þrisvar sinnum gert tilboð í leikmanninn.

Everton lét bæði Antolín Alcaraz og Sylvain Distin fara eftir síðasta tímabil og því er Phil Jagielka eini miðvörðurinn með reynslu í leikmannahópi Everton.

Mori, sem er 24 ára, hefur leikið með River Plate allan sinn feril og vann m.a. Copa Libertadores (ígildi Meistaradeildarinnar í Suður-Ameríku) með liðinu fyrr í þessum mánuði. Mori hefur leikið einn landsleik fyrir Argentínu.

Everton mætir Manchester City í 3. umferð ensku úrvalsdeildarinnar á sunnudaginn. Lærisveinar Robertos Martínez eru með fjögur stig eftir fyrstu tvær umferðirnar á meðan City er með fullt hús stiga.