Hættu samningsviðræðum við Barton vegna óánægju stuðningsmanna

West Ham staðfesti í dag að félagið hefði slitið samningaviðræðum við enska miðjumanninn Joey Barton en enskir miðlar greindu frá því í vikunni að Barton væri í læknisskoðun hjá Hömrunum.

Barton sem er umdeildur leikmaður er án samnings eftir að QPR ákvað ekki að endurnýja samning hans í sumar og hefur hann verið orðaður við ýmis lið í ensku úrvalsdeildinni.

Þegar fréttir bárust af því að hann væri í læknisskoðun hjá West Ham náðu enskir miðlar að grafa upp gamlar færslur stjórnarformanns West Ham þar sem hann gagnrýndi Barton harðlega á Twitter-síðu sinni.

Samkvæmt heimildum Daily Mirror vildi þjálfarateymi liðsins ganga frá samningi við Barton en hætti við á síðustu stundu vegna viðbragða stuðningsmanna West Ham. Reyndust flestir þeirra vera á móti hugmyndinni að fá Barton þrátt fyrir að félagið þyrfti ekki að greiða fyrir hann.