De Gea verður uppi í stúku gegn Aston Villa á morgun

David De Gea verður ekki í leikmannahópi Manchester United á morgun þegar liðið sækir Aston Villa heim í 2. umferð ensku úrvalsdeildarinnar. Þetta staðfesti Louis van Gaal, knattspyrnustjóri United, á blaðamannfundi fyrir leikinn.

Spænski markvörðurinn hefur verið sterklega orðaður við Real Madrid í sumar en nær daglega berast fréttir af mögulegum félagaskiptum hans til spænska stórveldisins.

De Gea var einnig utan hóps þegar United vann Tottenham í 1. umferð úrvalsdeildarinnar á laugardaginn en van Gaal taldi hann ekki í rétta hugarástandinu til að spila leikinn. Sergio Romero stóð í marki United á laugardaginn og hélt hreinu í sínum fyrsta leik fyrir félagið.

„Hann verður ekki í hóp á morgun. Það er sama staða uppi á teningnum og var fyrir síðasta leik,“ sagði van Gaal og bætti því við Marcos Rojo sé ekki enn kominn í nógu gott leikform til að spila og Phil Jones sé enn frá vegna blóðtappa sem hann fékk í síðustu viku.

Á fundinum talaði Van Gaal einnig um að United þurfi að bæta árangur liðsins á útivelli ætli það sér að berjast um Englandsmeistaratitilinn.

„Það er lykilatriði fyrir okkur,“ sagði Hollendingurinn en United vann aðeins sex af 19 útileikjum liðsins á síðasta tímabili.

„Við verðum að bæta okkur í útileikjunum, því við erum með eitt besta lið landsins á heimavelli. Við viljum gera Old Trafford að gryfju en við verðum að spila betur á útivelli og þurfum að bæta okkur þar,“ sagði van Gaal að lokum.