Sóknarmaður Lyon staðfestir að hann sé á leiðinni til Tottenham

Clinton N'Jie, leikmaður Lyon, staðfesti í gærkvöld á Instagram-síðu sinni að hann væri á förum frá félaginu og hann myndi skrifa undir hjá Tottenham í ensku úrvalsdeildinni.

Kemur hann til liðsins á sama tíma og félagið er að losa sig við Robert Soldado og Emmanuel Adebayor. Þakkaði hann starfsmönnum, forseta, leikmönnum og stuðningsmönnum Lyon áður en hann staðfesti að hann væri að skrifa undir hjá Tottenham.

N'Jie sem er frá Kamerún hefur leikið með Lyon en hann lék fyrsta leik sinn fyrir aðallið Lyon í nóvember 2012. Hefur hann leikið alls 43 leiki í öllum keppnum fyrir franska félagið og skorað í þeim átta mörk, öll í þeim 33 leikjum sem hann lék á síðasta tímabili.

Þrátt fyrir ungan aldur hefur hann leikið ellefu landsleiki fyrir Kamerún en fjölmiðlar hafa verið duglegir að líkja honum við Samuel Eto'o, einn af bestu leikmönnunum í sögu Kamerún.

Je tiens à remercier tout le staff lyonnais , le président ainsi que tout les supporters ainsi que mes coéquipiers de l'#OL . Et je vous remercie aussi pour vos messages de soutien . Nouveau chapitre maintenant . #Tottenham #Spurs

A photo posted by Clinton Njie (@clinton_njie) on Aug 13, 2015 at 11:51am PDT