Ákveðið að ráða reyndan rekstrarmann í stól bæjarstjóra

Rósa Guðbjartsdóttir, formaður bæjarráðs Hafnarfjarðar, segir að bæjarstjórn hafi ákveðið að ráða reyndan rekstrarmann í starf bæjarstjóra. Meðal annars til að spara ráðgjafakostnað sem hafi verið óheyrilega mikill í tíð fyrri meirihluta. Gagnrýnt er að launakostnaður bæjarstjórans hafi aukist um margar milljónir meðan tólf reyndum starfsmönnum sé sagt upp hjá bænum vegna hagræðingar.

Rósa segir að uppsagnir starfsmannanna hafi verið nauðsynlegar vegna fortíðarvanda.

„Það er aldrei réttur tími til að segja upp fólki og það eru alltaf sársaukafullar eins og þú segir. Þær eru jafn sársaukafullar núna eins og þær voru fyrir fjórum árum þegar að fráfarandi meirihluti sagði yfir 70 manns upp í þremur uppsagnarhrinum. Þetta er alltaf sársaukafullt og þetta er neyðarúrræði.“

Bæjarfulltrúi Samfylkingarinnar gagnrýndi uppsagnirnar harðlega í gær og sagði að launakostnaður bæjarstjórans væri á sama tíma fimm milljónum hærri á ári.

„Hafnarfjörður er nefnilega fyrst og fremst samfélag en ekki eitthvert excelskjal og starfsfólk bæjarins auðvitað fyrst og fremst manneskjur, en ekki bara tölur á blaði,“ segir Gunnar Axel Axelsson.

Ráðinn vegna þekkingar og reynslu

Rósa segir ekkert nýtt í launakjörum bæjarstjórans. Hann hafi verið ráðinn inn vegna reynslu og þekkingar og rekstri og það hafi margborgað sig.

„Þarna er maður með gríðarlega mikla reynslu og sem dæmi má nefna að á fyrri hluta síðasta árs voru notaðar gríðarlega upphæðir í utanaðkomandi fjármálaráðgjöf. Eins og til dæmis einstakt verkefni sem kostaði um 120 til 30 milljónir króna. Um var að ræða aðstoð eða ráðgjöf við endurfjármögnun á lánum sveitarfélagsins.“

„Það er samskonar verkefni sem núverandi bæjarstjóri hefur tekið að sér í öðrum sveitarfélögum og ég fullyrði að hann hefði getað tekið að sér.“

Gunnar Axel segir þó fráleitt að draga alþjóðlegan ráðgjafa, sem hafi verið fenginn til að endurfjármagna lán bæjarins eftir efnahagshrunið, inn í þessa umræðu.

„Með fullri virðingu fyrir núverandi bæjarstjóra veit ég ekki til þess að hann hafi nokkra einustu þekkingu eða reynslu af alþjóðlegri samningagerð af slíkri stærðargráðu,“ segir Gunnar Axel.