Þriggja mánaða skilorð fyrir manndráp af gáleysi

Héraðsdómur Suðurlands hefur dæmt tékkneskan karlmann, Martin Michale, í þriggja mánaða skilorðsbundið fangelsi fyrir manndráp af gáleysi.

Martin var ökumaður bíls sem valt út af Biskupstungnabraut undir Ingólfsfjalli þann 9. apríl síðastliðinn. Mikil hálka var á veginum þegar slysið varð en bíllinn valt nokkrar veltur. Hraði bílsins var alltof mikill miðað við aðstæður.

Sex manns voru í bílnum sem var fimm sæta og lést farþeginn í farangursgeymslunni af sárum sínum. Sá hét Alexandru Bejinariu og var 23 ára Rúmeni. Tekið er fram í dómnum að ökumaðurinn og hinn látni hafi verið bestu vinir. Annar farþegi var fluttur slasaður á sjúkrahús.

Michale játaði skýlaust brot sín fyrir dómi. Auk fyrrgreindrar refsingar var hann sviptur ökuréttindum í eitt ár og gert að greiða allan málskostnað og laun verjanda síns. Sá kostnaður nemur tæpum tveimur milljónum króna.