Kom til átaka á milli íbúa í Vogahverfi og írsku farandverkamannanna eftir handtöku þeirra

Fimm karlmenn frá borginni Cork á Írlandi voru handteknir af lögreglunni á höfuðborgarsvæðinu. Um var að ræða hina umtöluðu írsku farandverkamenn sem lögreglan hafði varað við. Lögreglunni hafði borist kæra frá íbúa í Vogahverfinu í Reykjavík á hendur mannanna vegna svika.

„Þeir höfðu komið og boðið þjónustu sína og stóðu svo ekki við það sem þeir ætluðu sér. Sá sem var búinn að fá þá í ákveðið verk var búinn að láta þá hafa peninga og þeir sýndu sig ekki aftur á svæðinu. Það er svona upphafið að þessu,“ segir Gunnar Hilmarsson, aðalvarðstjóri hjá lögreglunni á höfuðborgarsvæðinu.

Gunnar segir mennina hafa farið á nokkra staði og boðið fólki þjónustu, þar á meðal að mála hús og taka til í görðum. „Og við náðum í þá í gær og tókum af þeim skýrslur og þeim var sleppt í eftirmiðdaginn í gærkvöldi,“ segir Gunnar.

Einum þeirra lenti saman við kæranda

Þetta var ekki það síðasta sem lögreglan átti eftir að sjá af mönnunum þennan daginn því einn þeirra fór til mannsins í Vogahverfinu sem kærði þá og vildi ræða málin. Gunnar segir að komið hafi til handalögmála á milli Írans og íbúans í Vogahverfinu. Gunnar segir lögregluna hafa verið kallað til vegna þeirra átaka. Ekki er vitað hver átti upptökin að átökunum og ekki hafi borist kæra vegna þeirra. „Það skýrist þá í dag vonandi.“

Ekki aðdáendur knattspyrnuliðs Cork

Mennirnir eru sem fyrr segir frá Cork á Írlandi en í kvöld eigast við knattspyrnulið Cork og Knattspyrnufélag Reykjavíkur, betur þekkt sem KR, í forkeppni Evrópudeildar UEFA. Fyrri leikurinn fór 1-1 úti í Írlandi og fer seinni leikurinn fram í Frostaskjóli í kvöld.

Aðspurður segir Gunnar lögregluna hafa talið þá í fyrstu vera aðdáendur knattspyrnuliðsins Cork og komnir til Íslands til að fylgjast með sínum mönnum. „En þetta eru ekki fótboltaáhugamenn, það eru engin tengsl þar á milli. Þetta er bara tilviljun en við vorum með kenningar hérna en þær stóðust ekki þegar var rætt við þá,“ segir Gunnar sem segir írsku farandverkamennina vissulega komast á leikinn í kvöld hafi þeir áhuga á því.

Á varðbergi fyrir gylliboðum

Gunnar segir mennina hafa stundað það í mörg að fara um Evrópu og leita sér að vinnu og bjóða fram krafta sína. Hann segist ekki vita hvort þeir ætli að dveljast lengi hér á landi en biður fólk um að vera á varðbergi.

„Ef það fær einhver svakaleg gylliboð sem virðast óraunveruleg þá ætti það að hafa varan á sér ef einhver bankar upp og býðst til að slá garðinn eða mála húsið fyrir upphæðir sem standast ekki.“