Hægir á snúningi jarðar: Einni sekúndu bætt við morgundaginn

Síðasta mínúta morgundagsins mun innihalda 61 sekúndu í stað hinna hefðbundnu sextíu. Er þetta gert til að samræma atómklukkur heimsins og snúning jarðar.

Í frétt Mashable segir að á morgun verði hægt að lesa á atómklukkum 23:59:59 og 23:59:60, áður en klukkan slær 00:00:00.

Á vef Almanaks Háskóla Íslands segir að samræmdur heimstími (Coordinated Universal Time, skammstafað UTC) sé sá tími sem venjulegar klukkur miðast við, með föstu fráviki sem fer eftir því hvar í heiminum menn eru staddir.

„Til að ákvarða þennan tíma eru notaðar atómklukkur sem ganga afar jafnt. Tíminn er þannig stilltur að hann fer mjög nærri miðtíma (meðalsóltíma) í Greenwich eins og hann er skilgreindur með tilliti til þess hvernig jörðin snýr við sólu. Sjaldnast er gerður greinarmunur á samræmdum heimstíma og miðtíma Greenwich (GMT), en þó er þarna örlítill munur á.

Munurinn stafar af óreglum í snúningi jarðar, sem hafa áhrif á meðalsóltímann en ekki atómklukkurnar. Til þess að munurinn verði aldrei meiri en 0,9 sekúndur er samræmdur heimstími leiðréttur um eina sekúndu, venjulega í lok júní eða í lok desember,“ þegar það á við.