Frjókornin að fara af stað eftir sólríka helgi

Unnur Steina Björnsdóttir, ofnæmislæknir, segir fólk ekki byrjað að kvarta mikið undan frjókornaofnæmi.

„En miðað við góða veðrið um helgina ætti þetta að vera að fara af stað.“ Hún nefnir birki-, súru- og grasfrjó. Það er því mikilvægt að fólk sem er með einkenni sé byrjað að taka fyrirbyggjandi nefúða og ofnæmislyfin þegar það verður ofnæmisins vart. Samkvæmt Náttúrufræðistofnun Íslands voru engin frjó í loftinu í síðustu viku enda hefur vorið verið kalt og blautt.

Einkenni frjókornaofnæmis eru góðkunn þeim sem hafa verið að kljást við það undanfarin sumur. „Kláði í augum og í nefkoki, tárarennsli og glært nefrennsli. Nefstífla, hnerraköst og ofnæmisastmi,“ útskýrir Unnur. Hún segir að þrátt fyrir að það sé ekki algengt þá geti fólk greint hjá sér ofnæmi á fullorðinsaldri. „Þetta er algengara hjá börnum og unglingum en við sjáum alltaf fullorðið fólk sem er að fá frjókornaofnæmi.“

Unnur segir að auk ofnæmislyfja sé hægt að leita annarra leiða sem geti veitt langvarandi vernd gegn frjókornaofnæmi. Hún nefnir bæði sprautumeðferðir og lyf sem sett eru undir tungu. „Ýmislegt nýtt á döfinni hvað varðar þau mál.“

Það er hægt að bregða á ýmis ráð til þess að verjast frjókornunum „Sleppa því að hengja út þvottinn sinn, reyna að vera duglegur að skola af sér frjókornin, vera með stór skýlandi sólgleraugu og sleppa því að nota linsur. Frjókornin geta farið undir linsuna og valdið einkennum.“