Leggja til dag tileinkaðan mannréttindum barna

Á Alþingi liggur nú fyrir þverpólitísk þingsályktunartillaga um að 20. nóvember ár hvert, dagurinn þegar barnasáttmáli Sameinuðu þjóðanna var samþykktur hérlendis, verði helgaður fræðslu um mannréttindi barna í skólum landsins.

Barnasáttmálinn var lögfestur hér á landi árið 2013 og felur í sér skuldbindandi samkomulag þjóða heims um sérstök réttindi fyrir börn, óháð réttindum fullorðinna. Aðildarríki sáttmálans skuldbinda sig til að kynna meginreglur og ákvæði samningsins víða með viðeigandi og virkum hætti, jafnt börnum sem fullorðnum.

Í nefndaráliti allsherjar- og menntamálanefndar segir að allir þeir umsagnaraðilar sem nefndin ráðfærði sig við hafi verið jákvæðir um efni þingsályktunartillögunnar og hafi bent á mikilvægt væri að fræðsla um réttindi barna væri samofin starfi þeirra í skólum landsins.

“Nefndin tekur undir þessi sjónarmið og vísar til þess að einstaklingar þurfa að þekkja réttindi sín til þess að geta notið þeirra og staðið vörð um þau. Slík þekking er einnig forsenda þess að þeir sýni réttindum annarra tilhlýðilega virðingu og geti lagt sitt af mörkum til að tryggja að þeir fái notið þeirra,” segir í álitinu.

Þar segir ennfremur að mikilvægt sé að leggja áherslu á kynningu og fræðslu um barnasáttmálann en slíkir fræðadagar eru nú þegar viðhafðir til fræðslu um íslenska tungu og íslenska náttúru.

„Barnaréttarnefnd Sameinuðu þjóðanna hefur lagt áherslu á kynningu og fræðslu um samninginn í ábendingum sínum til íslenskra stjórnvalda og hefur meðal annars hvatt til þess að mælt verði fyrir um hana í skólanámskrám. Slík fræðsla hlýtur að eiga að vera þáttur í almennu skólastarfi og samtvinnuð því með ýmsum hætti alla skóladaga. Tillagan er liður í því að stuðla að þessari mikilvægu kynningu og fræðslu um barnasáttmálann og skyldu ríkisins til þess að hafa árlega sérstakan dag í skólum sem er helgaður fræðslu um barnasáttmálann og þau mikilvægu og margvíslegu mannréttindi sem þar er mælt fyrir um.”

Að tillögunni standa níu þingmenn; Páll Valur Björnsson sem jafnframt er framsögumaður frumvarpsins, Unnur Brá Konráðsdóttir formaður allsherjar- og menntamálanefndar, Líneik Anna Sævarsdóttir, Elsa Lára Arnardóttir, Guðbjartur Hannesson, Helgi Hrafn Gunnarsson, Jóhanna María Sigmundsdóttir, Bjarkey Olsen Gunnarsdóttir og Hanna Birna Kristjánsdóttir.