Segir þjóðarstoltið hafa skipt máli í kreppunni

Sigmundur Davíð Gunnlaugsson, forsætisráðherra, segir að þjóðarstolt Íslendinga hafi verið mikilvægt til þess að takast á við þau vandamál sem þjóðin stóð frammi fyrir í kjölfar efnahagshrunsins. Þetta kom fram í viðtali við forsætisráðherrann á BBC World Service í dag.

Þáttastjórnandi spurði Sigmund Davíð hvað Grikkir gætu lært af Íslandi en mikið hefur verið talað um að þeir ætli sér að fara „íslensku leiðina“ út úr kreppunni með því að setja bankana í þrot og koma á gjaldeyrishöftum.

Stór munur á vanda Íslendinga og Grikkja

Forsætisráðherra fór varlega í að gefa Grikkjum ráð þó hann segði að það mætti eflaust læra ýmislegt af því hvernig Ísland tókst á við kreppuna. Það væri þó stór munur á stöðu landanna þar sem Grikkland væri í Evrópusambandinu og með evru, ólíkt Íslandi.

Sagði Sigmundur að það hafi á margan hátt verið hjálplegt að Ísland var með sinn eigin gjaldmiðil og ekki í ESB þegar kreppan skall á. Benti hann meðal annars á það atvinnuleysi hér hafi ekki náð þeim hæðum sem það gerði í Suður-Evrópu auk þess útflutningur hafi aukist.

Icesave spurning um þjóðarstolt

Inntur eftir því Ísland hafi náð að halda virðingu sinni og þjóðarstolti, öfugt við Grikki, sagði Sigmundur:

„Ég held að ákveðið þjóðarstolt sé mikilvægt þegar kemur að því að taka á alls kyns vandamálum, þar á meðal efnahagslegum. Það hjálpar ef menn eru stoltir af sínu samfélagi, sögunni. Það hjálpar til við að þjappa fólki saman og leysa vandann, jafnvel þegar menn standa frammi fyrir því sem virðast vera hótanir.“

Hann sagði það meðal annars hafa verið spurningu um þjóðarstolt að íslenskur almenningur ætti ekki að borga Icesave-skuldirnar þó allir hafi verið sammála um að það þyrfti að borga innistæðueigendum í Bretlandi og Hollandi. Sá peningur átti einfaldlega að koma úr þrotabúum föllnu bankanna eins og raunin varð.