Segir breytingartillögu vegna makríls ekki vænlega til sátta

Þingfundi sem hefjast átti klukkan ellefu í morgun hefur ítrekað verið frestað og er nú áætlað að hann hefjist klukkan 17. Ástæða seinkunarinnar er breytingtillaga frá meirihluta atvinnuveganefndar við frumvarp sjávarútvegsráðherra um stjórn makrílveiða.

Tillagan gerir ráð fyrir að aflahlutdeild í makríl verði úthlutað til þriggja ára í stað sex eins og gert var ráð fyrir í frumvarpi ráðherra og kvótinn verði ekki framseljanlegur, þótt menn geti skipt á honum og öðrum fisktegundum innan fiskveiðiársins. Þá geti menn ekki selt aflaheimildirnar varanlega frá sér.

Sigurður Ingi Jóhannsson, sjávarútvegsráðherra, fundaði með formönnum stjórnarandstöðuflokkanna vegna málsins fyrr í dag og segir Katrín Jakobsdóttir formaður Vinstri grænna að þessi tillaga sé ekki leið til sátta.

„Því miður tel ég það ekki vera. Þarna er verið að leggja fram þá tillögu að makríllinn verði núna hluti af hinu almenna kvótakerfi sem er auðvitað stórmál. Þetta er verið að leggja til núna meira en tveimur vikum eftir að starfsáætlun þingsins er lokið. Það hefur öllum verið ljóst að þetta er eitt af stóru, umdeildu málunum í þinginu. Það að leggja til með þessum hætti að makríllinn verði hluti af almenna kvótakerfinu, án þess að það sé komið neitt auðlindaákvæði inn í stjórnarskrá, án þess að við höfum hugmynd um hvaða hugmyndir menn hafa um framtíðarfyrirkomulag fiskveiðistjórnunarkerfisins, þetta er auðvitað ekki vænlegt til sátta.“

Tugir þúsunda hafa skrifað undir áskorun til forseta Íslands um að staðfesta ekki lög um makrílveiðar sem byggðu á frumvarpi sjávarútvegsráðherra og stjórnarandstaðan vill að málið verði geymt til haustsins og verði þá hluti af heildarendurskoðun á lögum um stjórn fiskveiða.

Þorsteinn Sæmundsson fulltrúi Framsóknarflokksins í atvinnuveganefnd segir tillöguna koma til móts við stjórnarandstöðuna.