Bryndís Björgvinsdóttir fær barnabókaverðlaun skóla- og frístundaráðs

Bryndís Björgvinsdóttir tók í dag við barnabókaverðlaunum skóla- og frístundaráðs Reykjavíkur, en þau voru afhent við hátíðlega athöfn í Höfða. Verðlaunin fær hún fyrir bókina Hafnfirðingabrandarann sem Vaka Helgafell gaf út.

Marta Hlín Magnadóttir og Birgitta Elín Hassel fengu verðlaunin fyrir þýðingu sína á Eleanor og Park sem gefin var út af Bókabeitunni.

Barnabókaverðlaunin voru afhent í 43. sinn í dag. Dagur B. Eggertsson borgarstjóri og Skúli Helgason, formaður skóla- og frístundaráðs, fluttu stutt ávörp við athöfnina í Höfða, grunnskólanemendur úr Austurbæjarskóla sungu og sigurvegarar úr Stóru upplestrarkeppninni lásu upp úr verðlaunabókunum.

Í umsögn valnefndar um verðlaunabókina Hafnfirðingabrandarann segir meðal annars: „Hafnfirðingabrandarinn er marglaga skáldsaga þar sem fjallað er um sígild stef í lífi unglinga eins og fyrstu ástina og ástarsorgina, félagslíf og samskiptamynstur sem aldrei er eins flókið og á unglingsárum, ofsakvíða, ofsakæti og allt þar á milli. Sagan er umfram allt skrifuð af leiftrandi stílgáfu, umvefjandi hlýju og heilnæmum húmor sem fær lesendur á öllum aldri til að njóta lestrarins og hreinlega tæta bókina í sig.“

Í umsögn um þýðingu unglingabókarinnar Eleanor og Park segir meðal annars:

„Eleanor og Park hefur hlotið fjölda verðlauna og viðurkenninga erlendis og dýrmætt þegar slíkar bækur rata inn í íslenskt málsamfélag og verða hluti af því. Það er vandaverk að skrifa bók í nútímanum fyrir nútímaunglinga á trúverðugu orðfæri unglinga fyrir tuttugu árum á þann hátt að textinn virki hvorki framandi né klisjukenndur. Þegar bætist svo í ofanálag að þýða sama texta yfir á annað tungumál verður málið enn snúnara. Þeim Mörtu Hlín Magnadóttur og Birgittu Elínu Hassell tekst einstaklega vel að ná þessu takmarki án þess að það sé á kostnað læsileika og flæðis textans.“

Í tilkynningu frá Reykjavíkurborg segir að Barnabókaverðlaun skóla- og frístundaráðs þjóni þeim tilgangi að vekja athygli á gildi góðra bókmennta í uppeldisstarfi og á metnaðarfullri útgáfu barnabóka.

Valnefnd var að þessu sinni skipuð Brynhildi Björnsdóttur formanni, Jónu Björgu Sætran og Gunnari Birni Melsted.