Hótaði lögreglumönnum lífláti eftir að þeir tóku hann fyrir ölvunarakstur

Ríkissaksóknari hefur gefið út ákæru á hendur 51 árs gömlum karlmanni fyrir umferðarlagabrot, lögreglulagabrot og hegningarlagabrot sem rekja má til þess að hann var tekinn fyrir akstur undir áhrifum áfengis í apríl í fyrra.

Lögreglan stöðvaði för mannsins en hann veitti mótspyrnu við handtöku og fór ekki að fyrirmælum lögreglu um að yfirgefa bifreiðina þegar hann var beðinn um það. Maðurinn keyrði þvert á móti af stað og ók um sextíu metra, en annar lögreglumannanna sem stöðvaði hann var þá kominn hálfur inn í bílinn. Ætlaði hann að handtaka manninn og koma í veg fyrir að hann keyrði lengra.

Eftir að maðurinn var handtekinn hafði hann í hótunum við lögreglumennina tvo sem stöðvuðu för hans. Hafði hann bæði uppi líflátshótanir og hótanir um líkamsmeiðingar í lögreglubílnum og á lögreglustöðinni á Hverfisgötu þegar þangað var komið.

Mál ríkissaksóknara gegn manninum var þingfest í Héraðsdómi Reykjaness í gær.