Ásgeir Kolbeinsson kærir einn eigenda Austurs fyrir alvarlegar hótanir

Ásgeir Kolbeinsson fjölmiðlamaður hefur kært einn meðeiganda sinn að skemmtistaðnum Austur fyrir hótanir í garð sinn og fjölskyldu sinnar. Harðvítugar deilur hafa átt sér stað innan eignarhaldsfélagsins 101 Austurstræti , sem fer með rekstur Austurs, og er rekstur félagsins nú til rannsóknar hjá lögreglu höfuðborgarsvæðisins og sýslumanns.

Kjarninn greindi fyrst frá kærunni. Í samtali við Vísi segir Ásgeir að hann hafi lagt fram kæruna fyrir um það bil fjórum til sex vikum.

„Maður fær nú litlar upplýsingar um það hvar málið er statt en vonandi er það í góðum farvegi,“ segir Ásgeir. „Þetta eru náttúrulega bara alvarlegar hótanir.“

Meðeigandinn sem um ræðir er Íraninn Kamran Keivanlou sem deilt hefur við Ásgeir um eignarhald og rekstur Austurs. Ásgeir segir að kæran snúi að einu ákveðnu atviki sem sneri að þessum deilum. Hann hefur afhent lögreglu upptöku af atvikinu sem hann segir óyggjandi sönnunargagn um  hótanir Kamran.

„Það er það algjörlega,“ segir Ásgeir. „Það heyrist mjög skýrt og greinilega.“