Austur til rannsóknar hjá lögreglu og sýslumanni

Lögreglan á höfuðborgarsvæðinu og embætti sýslumanns eru með rekstur skemmtistaðarins og Austurs, við Austurstræti 7 í Reykjavík, til rannsóknar. Stundin greindir frá.

Hafliði Þórðarson aðstoðaryfirlögregluþjónn hjá Lögreglunni á höfuðborgarsvæðinu staðfestir að til rannsóknar sé mál til tengt rekstri Austurs. “Það hafa verið kærð ætluð saknæm háttsemi varðandi fjármál staðarins,“ segir Hafliði.

Málið er nú statt hjá ákærusviði sem mun taka ákvörðun um hvort rannsaka þurfi málið frekar eða ástæða sé til að gefa út ákæru að sögn Hafliða.



Harðvítugar deilur um eignarhald

Málið snýst um harðvítugar deilur innan einkahlutafélagsins 101 Austurstrætis sem sér um rekstur Austurs. Deilurnar hófust þegar félagið Alfacom General Trading í eigu Íranans Kamran Keivanlou keypti helmingshlut í 101 Austurstræti haustið 2013. Félagið keypti fjórðung af Ásgeiri Kolbeinssyni og hinn fjórðunginn af félagi í eigu Styrmis Þórs Bragasonar, fyrrverandi forstjóra MP banka.

Félagið hefur ekki greitt fyrir nema helming hlutafjárins. Styrmir og Ásgeir hafa stefnt Alfacom til að greiða afgang kaupverðsins. Á móti segir Kamran að staða félagsins hafi verið sögð mun betri fyrir kaupin en hún var í raun og veru. Þá hafi heldur ekki verið staðið við loforð um arðgreiðslur og um að Kamran veitti samþykki fyrir öllum greiðslum félagsins.

Lét loka posum staðarins

Vegna deilna um samþykki fyrir greiðslum félagsins lét Kamran loka posum félagsins. Um sama leiti var viðskiptum við Íslandsbanka, viðskiptabanka 101 Austurstræti, slitið.

Í kjölfar þess stofnaði Ásgeir Kolbeinsson, félagið Austurstræti 5 sem tekur við greiðslum og starfrækir posa Austurs. Vínveitingarleyfi staðarins er hins vegar enn skráð á 101 Austurstræti. Þetta sætta forsvarsmenn sig Alfacom ekki við og hafa farið fram á við lögreglu og  embætti sýslumanns að rekstri staðarins verði lokað þar sem félagið hafi hvorki leyfi til rekstursins né gildan leigusamning.

Stefnur gengið á víxl

Ásgeir blæs hins vegar á ásakanir um nokkuð misjafnt við Austurstræti 5 en félagið er til rannsóknar hjá embætti sýslumanns sem skoðar hvort félagið hafi tilskilin rekstarleyfi.

„Það er ekkert ólöglegt í gangi hérna,“ segir Ásgeir í samtali við Stundina. Hann segir að Austurstræti 5 taki bara við greiðslum sem renni til 101 Austurstrætis. Því sjái Austurstræti 5 einungis um greiðslumiðlun fyrir félagið.

Þá hafa stefnur gengið á víxl auk þess sem kærur hafa borist lögreglu. „Við stefndum honum til greiðslu á þessu. Auðvitað fer hann í gagnstefnu á móti og stefnir okkur fyrir að hitt og þetta hafi ekki staðist, og þess háttar. Það er ekkert launungamál að hann kærði okkur til lögreglu, bara til að varpa skugga á okkur. Það er ekkert í þessu. Við höfum ekkert að fela í þessu máli,“ segir Ásgeir.