Árlegt söfnunarátak ABC barnahjálpar hefst á föstudaginn

Árlegt söfnunarátak ABC barnahjálpar, Börn hjálpa börnum, hefst formlega 20. mars næstkomandi og mun standa yfir til 19. apríl. Þetta er í 18. sinn sem þessi söfnun fer fram. Þetta kemur fram í tilkynningu frá ABC á Íslandi.

Forseti Íslands mun formlega hefja söfnunina á Bessastöðum kl. 13 á föstudaginn 20. mars og munu 33 nemendur úr 5. bekk Fossvogsskóla verða viðstaddir. Forsetinn mun setja fyrstu framlögin í baukana sem börnin hafa með sér.

Átakið er unnið í samstarfi við grunnskóla landsins. Börnum er úthlutað götum í sínu skólahverfi þar sem þau ganga í hús tvö og tvö saman og safna í söfnunarbauka.

Í ár verður safnað fyrir öðrum áfanga byggingu skóla og heimavistar fyrir ABC starfið í Nairobi í Kenýa. Grunnur að fyrstu hæð var lagður eftir söfnunina Börn hjálpa börnum árið 2013 og var fyrsta hæðin byggð í fyrra fyrir söfnunarféð með stuðningi frá utanríkisráðuneytinu. Í ár verður safnað fyrir annarri hæð sömu skólabyggingar sömuleiðis með stuðningi frá utanríkisráðuneytinu.

Í fyrra var söfnunarfénu varið í að byggja heimavist fyrir fátækar stúlkur í Machike í Pakistan en rúmlega 8 milljónir króna söfnuðust þá.

Alls tóku 88 grunnskólar þátt í söfnuninni á síðasta ári og hafa nemendur ávallt staðið sig með stakri prýði og reynst mikilvægir sendiherrar starfsins.

Þeim sem vilja leggja söfnuninni lið er bent á söfnunarreikningsnúmer: 515-14-110000. Kt: 690688-1589