Ákærð fyrir tugmilljóna skattsvik: Segir að skatturinn hafi „spilað með“

Aðalmeðferð í máli sérstaks saksóknara gegn Jóni Garðari Ögmundssyni og Ásgerði Guðmundsdóttur vegna meintra skattsvika þeirra fór fram í Héraðsdómi Reykjavíkur í gær.

Ásgerður og Jón Garðar eru ákærð fyrir að hafa ekki staðið skil á opinberum gjöldum sem haldið var eftir af launum starfsmanna veitingastaðarins Metro á árunum 2011 og 2012. Jón Garðar er ákærður fyrir skattsvik upp á tæplega 35 milljónir króna og Ásgerður fyrir tæplega 34 milljónir króna. Saksóknari fer fram á að þau verði bæði sakfelld og dæmd til að greiða sektir vegna skuldanna við skattinn.

Sjá einnig: Skattsvik upp á tæpar 60 milljónir króna

Var framkvæmdastjóri en samt ekki

Jón Garðar var stjórnarformaður félagsins Líf og heilsa ehf. sem var rekstrarfélag Metro og Ásgerður skráður framkvæmdastjóri þess. Við skýrslutöku fyrir dómi í gær kom fram að hún hafi í raun ekki starfað sem slíkur, heldur Jón Garðar, og hún sinnt starfsmannamálum Metro-staðanna.

Líf og heilsa ehf. var upphaflega í eigu Ásgerðar en hún stofnaði það árið 2004 utan um eigin rekstur. Árið 2010 tók Jón Garðar félagið svo yfir og rekstur Metro-staðanna fór undir hatt þess.

Fyrir dómi kvaðst Ásgerður ekkert hafa komið að rekstri Líf og heilsu. Fjármál félagsins hafi verið í höndum Jóns Garðars og henni hafi því til að mynda ekki verið kunnugt um að félagið ætti í fjárhagserfiðleikum. Hún hafi í raun fyrst gert sér grein fyrir alvarleika málsins við yfirheyrslu hjá skattrannsóknarstjóra árið 2012. Þá hafi hún ekkert haft með staðgreiðslu launa að gera og gat ekki svarað því hvers vegna ekki voru staðin skil á henni.

Heimsótti skattinn einu sinni í mánuði þegar það safnaðist skuld

Jón Garðar gaf einnig skýrslu í málinu og rakti aðdraganda þess að hann tók yfir Líf og heilsu árið 2010. Hann hafði þá rekið McDonald‘s-staðina á Íslandi undir merkjum félagsins Lyst ehf. en fyrirtækið fór í þrot og vildi Jón Garðar þá finna nýtt félag svo hann gæti haldið áfram rekstri veitingastaða undir nafninu Metro.

Saksóknari spurði Jón Garðar hvers vegna staðgreiðslu hafi ekki verið skilað:

„Ég var að basla aðeins með sjóðstreymi á þessum tíma. Ég var að reyna að endurfjármagna félagið og selja það eða selja hluta þess. Þegar það safnaðist skuld hjá skattinum þá heimsótti ég skattinn að minnsta kosti einu sinni í mánuði og ræddi við þá hvað ég gat greitt og hvað ekki. Ég upplýsti þá um stöðuna og samdi um nokkra hluti.“

Hann bætti svo við þegar að verjandi hans spurði út í stöðu fyrirtækisins og skattinn:

„Þeir vissu hver staðan var og það má kannski segja að skatturinn hafi „spilað með.““

Aðspurður sagði hann engan annan hjá fyrirtækinu hafa komið að skattskilum nema ef til vill bókara sem starfaði fyrir hann í hlutastarfi.

Fullviss um að skuldin verði greidd

Fram kom við aðalmeðferðina að búið væri að taka Líf og heilsu til gjaldþrotaskipta. Ekkert hefur verið greitt inn á skuld fyrirtækisins við skattinn en Jón Garðar sagðist fullviss um að þegar búið væri að gera upp þrotabúið fengist að fullu upp í fjárhæðina.

Verjandi hans gagnrýndi því að farið væri af stað með málið áður en uppgjöri þrotabúsins væri lokið. Verjandinn lagði einnig áherslu á það að Jón Garðar hefði ekki haft neinn ásetning um að koma peningunum undan og stinga þeim í eigin vasa; það hafi einfaldlega ekki verið til peningur í fyrirtækinu.

Þá mótmælti verjandi Ásgerðar málsástæðum ákæruvaldsins og sagði það algjörlega ljóst að hún hefði ekki haft neitt með fjármál fyrirtækisins að gera, þrátt fyrir að vera skráður framkvæmdastjóri félagsins. Ásgerður hafi treyst Jóni Garðari til að sjá um fjármálin og ósannað væri að hún hefði gerst sek um refsiverða háttsemi þar sem hvorki væri til að dreifa ásetningi né hirðuleysi.

Saksóknari, Kristín Ingileifsdóttir, gaf lítið fyrir þessa málsvörn og sagði að þó að Ásgerður hafi aðeins verið framkvæmdastjóri „til málamynda“ þá bæri hún engu að síður ábyrgð á fjármálum Lífs og heilsu samkvæmt lögum. Hún vísaði einnig í dómafordæmi máli sínu til stuðnings.

Vill Jón Garðar í allt að árs fangelsi

Jón Garðar var í febrúar síðastliðnum dæmdur í fimm mánaða skilorðsbundið fangelsi fyrir skattsvik en þau brot áttu sér stað á árunum 2009 og 2010. Skattsvikin námu 22 milljónum króna auk þess sem hann var dæmdur til að greiða sekt upp á 45 milljónir króna.

Saksóknari tekur meðal annars mið af þessu við kröfur sínar um refsingu og fer fram á að Jón verði dæmdur í 12 mánaða óskilorðsbundið fangelsi. Þá er farið fram á að hann greiði hátt í 40 milljónir í sekt.