Helgistað álfa í Gálgahrauni bjargað

Í dag var fluttur stór og áberandi steinn úr vegstæði nýs Álftanesvegar í Gálgahrauni/Garðahrauni þar sem vegurinn liggur fram hjá Prýðishverfinu í Garðabæ. Þetta er þó enginn venjulegur steinn því hann er talinn helgistaður álfa og var talsmaður þeirra, Ragnhildur Jónsdóttir, fengin til að fylgjast með framkvæmdunum og tryggja góð samskipti á milli verktakans og álfanna.

Umræddur steinn var settur til hliðar við veginn þar sem er að finna aðrar tilkomumiklar steinmyndanir. „Þessi hluti sem er verið að færa núna er kallaður Ófeigskirkja. Þetta er kapella, til að nota mennskt orð yfir þetta. Ófeigskirkja er sett við hliðina á stórum helgistað, mikilli álfakirkju, sem er hérna þannig að þetta verður mikið helgisvæði. Þetta er svona bænastaður,“ segir Ragnhildur sem er afar þakklát þeim sem sáu um þessa framkvæmd að sýna álfunum þessa virðingu.

„Þetta er náttúrlega svakalegt fyrirtæki og heilmikið verk að koma þessu fyrir. Ég get ekki annað en verið ánægð og þakklát fyrir þessa virðingu sem er verið að sýna álfunum og þeirra helgistað. Mér finnst þeir vinna þetta af alúð þessir menn þó svo við hefðum verið algjörlega ósammála um hvar vegurinn eigi að liggja að þá getur maður ekki annað en verið þakklátur fyrir þessa virðingu sem helgistað álfanna er sýndur,“ segir Ragnhildur sem rekur Álfagarðinn í Hellisgerði en hún er einnig formaður Hraunavina og var á meðal níumenningana sem dæmdir voru til greiðslu 100 þúsund króna sektar fyrir að óhlýðnast lögreglu þegar þeir mótmæltu vegaframkvæmdum í hrauninu haustið 2013.

„Ég er talsmaður álfanna, það heyrist svo illa í þeim. Ég hefði aldrei samþykkt að vera með í þessu nema að álfarnir yrðu sáttir við að þessum bænastað yrði bjargað. Vegurinn mjókkar aðeins fram hjá stóru álfakirkjunni. Álfarnir voru náttúrlega ósáttir við þessa vegalagningu en fyrst að vegurinn var gerður þá eru álfarnir mjög sáttir við þetta. Kirkjan stóð í miðju vegstæðinu þannig að þetta hefði bara orðið uppfylling annars. Þetta er eiginlega tilraun í báðum heimum því þeir eru að færa orkuna sem umlykur kirkjuna og búnir að undirbúa þetta í heilt ár,“ segir Ragnhildur en spurð hvernig samskipti hennar við álfana fara fram svarar hún:

„Við bara tölum saman. Ég reyni yfirleitt að tala við þá í hljóði, svona innan um annað fólk.“