Terry berst fyrir lífi sínu hjá Chelsea

John Terry hefur engan áhuga á því að yfirgefa Chelsea og er að berjast fyrir nýjum samningi hjá félaginu.

Samningur Terry við félagið rennur út næsta sumar og hann vill spila áfram fyrir liðið. Hann hefur engan áhuga á því að fara til annars félags.

Hann var besti maður vallarins í úrslitum deildabikarsins síðasta sunnudag og minnti þá hraustlega á sig.

„Ég er að berjast fyrir sjálfan mig og fjölskyldu mína. Ég vil sýna og sanna að fólk hafi rangt fyrir sér. Þetta er alvöru áskorun og ég gef allt sem ég á," sagði Terry.

„Ég veit ekki hvað ég á mikið eftir. Vonandi nokkur ár en ef þetta er mitt síðasta tímabil hér þá vonast ég eftir að hætta með stæl. Mitt markmið er að spila hér næsta vetur og vonandi lengur.

„Ég gæti ekki hugsað mér að spila fyrir annað félag. Mér líður frábærlega og þetta væri ekki réttur tími til að hætta. Sá tími kemur auðvitað á endanum," sagði hinn 34 ára gamli Terry.