Einn alvarlega slasaður eftir árekstur við Rauðavatn

Einn er alvarlega slasaður eftir harðan árekstur tveggja bíla við Rauðavatn í Reykjavík um klukkan hálf ellefu fyrr í kvöld.

Að sögn Sigurbjörns Guðmundssonar, varðstjóra hjá slökkviliðinu, var sá sem slasaðist alvarlega fluttur á sjúkrahús skömmu eftir klukkan ellefu en bílstjóri hins bílsins slasaðist lítið. Mikil hálka og krapi er á slysstaðnum.

Bílarnir komu úr gagnstæðri átt, en bílstjórarnir voru báðir einir í bílunum.

Uppfært klukkan 23:57

Bílvelta varð við Kópavogslæk á Hafnarfjarðarvegi í kvöld. Ökumaður slapp með skrekkinn. Full ástæða til að hvetja ökumenn til að fara varlega enda hált á götum borgarinnar og í nágrenni.