Lagði hníf að hálsi barnsmóður fyrir framan tveggja ára barn þeirra

Karlmaður á fertugsaldri hefur verið ákærður fyrir líkamsárásir og hótanir gagnvart þáverandi eiginkonu sinni og ungu barni þeirra. Er maðurinn sakaður um að hafa sparkað í andlit konunar þar sem hún hélt á tveggja ára gömlum sini þeirra í fanginu. Þá lagði hann hníf upp að hálsi hennar og hótaði að skera höfuð hennar af gerði hún eitthvað rangt.

Ákært er fyrir tvær líkamsárásir á heimili þeirra í Reykjavík. Sú fyrri í ágúst 2012 þegar maðurinn á að hafa dregið konu sína inn á baðherbergi þeirra þar sem hann reyndi að ýta höfði hennar ofan í klósett. Þá ógnaði hann henni með hnífi og kastaði hnífnum á eftir konunni er hún flýði útaf heimilinu og leitaði aðstoðar hjá nágrönnum.

Síðari líkamsárásin varð ári síðar og er ákært fyrir líkamsárás og hótanir gagnvart konunni en einnig brot á barnaverndarlögum. Á maðurinn að hafa veist að konunni í hjónaherbergi þeirra þar sem hún lá með tveggja ára gamalt barn þeirra. Sparkaði hann í andlit konunnar og læri auk þess að slá hana í andlit og maga.

Þá hótaði ákærði konunni með því að leggja hníf upp að hálsi hennar og segjast ætla að skera höfuðið af ef hún hlýddi honum ekki.

„Með framangreindri háttsemi beitti ákærði son sinn ógnunum og sýndi honum yfirgang og ruddalegt athæfi,“ eins og segir í ákærunni.

Afleiðingar árásarinnar á konuna voru tognun í hálshrygg, bólga og eymsli á kinn, mar á vinstra herðablað og þreifieymslu á læri.

Er þess krafist að ákærði verðir dæmdur til refsingar og til greiðslu alls sakarkostnaðar. Maðurinn á yfir höfði sér allt að þriggja ára fangelsi. Þá krefst fyrrverandi kona hans 900 þúsund króna í skaða- og miskabætur.