Aðildarfélög SGS undirbúa verkfallsaðgerðir

Miklar líkur eru á að félagsmenn í Starfsgreinasambandinu hefji verkfallsaðgerðir öðru hvoru megin við páska. Himinn og haf er á milli sambandsins og Samtaka atvinnulífsins sem saka ríkisstjórnina um ábyrgðarleysi og reyna að vera stikkfrí í komandi kjaraviðræðum.

Samtök atvinnulífsins beina spjótum sínum að stjórnvöldum og segja þau hafa svikið ýmislegt sem samið var um í þríhliða viðræðum stjórnvalda og aðila vinnumarkaðarins. Segja þau ríkisstjórnina bera töluvert mikla ábyrgð á þeirri stöðu sem nú er á vinnumarkaðnum.

Ríkistjórnin hafi ekki staðið við lækkun tryggingagjalds samhliða minnkandi atvinnuleysi, tekjustofn fæðingarorlofssjóðs hafi verið skertur, framlag til jöfnunar örorkubyrði lífeyrissjóða og réttur til atvinnuleysisbóta sömuleiðis og þá hafi ríkisstjórnin ákveðið að virða ekki lögbundna skuldbindingu sína til framlags til starfsendurhæfingarsjóðsins Virk.

Þorsteinn Víglundsson, framkvæmdastjóri SA, segir alveg klárt að sú staða sem upp hafi komið sé að stórum hluta vegna þeirrar þróunar sem hafi átt sér stað á opinberum vinnumarkaði. „Auðvitað bera stjórnvöld ekki alla ábyrgð á því. Það voru hópar sem fóru á stjórnvöld með bólgnar og miklar kröfur sem þeir höfðu í gegn. Það hefur hins vegar mótað hér alveg nýja stöðu.“

Þróunin móti kröfur á almennum markaði nú og það valdi vonbrigðum að stjórnvöld hafi horfið frá farsælu þríhliða samstarfi við aðila vinnumarkaðarins.

„Það er breyting frá því sem verið hefur undanfarna þrjá áratugi og við teljum þetta ekki farsæla þróun. Við teljum að þetta fyrirkomulag hafi hjálpað okkur að takast á við mjög erfið viðfangsefni á vinnumarkaði og efnahagsmálum almennt í gegnum tíðina og það væri misráðið að hverfa frá því.“

Mikilvægt sé að fá stjórnvöld að samningum, þar geti enginn verið stikkfrí. Eftir að Samtök atvinnulífsins höfðuðu kröfum Starfsgreinasambandsins á mánudag sem samningsgrundvelli stefnir því allt í verkfall en sambandið mun vísa deilunni til ríkissáttasemjara næst komandi mánudag. Himin og haf skilur deiluaðila að og ólíklegt að samningar náist á næstu vikum.

Drífa Snædal, framkvæmdastjóri Starfsgreinasambandsins, segir það ekki vera neitt launungamál að sambandið sé farið að undirbúa aðgerðir. Aðildarfélögin okkar eru í startholunum og skoða útfærslur og svo framvegis. Ef við erum að tala um einhvern tímaramma þá gætu aðgerðir skollið á öðru hvorum megin við páska.“

Félögin séu nú að meta hvort gripið verði til tímabundinna aðgerða eða eða allsherjarverkfalls.

Drífa segist vonast til þess að SA sýni þá ábyrgð að setjast niður við samningaborðið. „Það er fyrsta skrefið.“