Guð er ekki áhugamaður um amerískan fótbolta

Margir af leikmönnum NFL-deildarinnar eru mjög trúaðir og einn sá trúaðasti er Russell Wilson, leikstjórnandi meistara Seattle Seahawks.

Wilson komst á ótrúlegan hátt í Super Bowl-leikinn eftir ótrúlegan endasprett gegn Green Bay Packers.

Ekkert hafði gengið upp framan af í leiknum hjá Wilson og hann kastaði boltanum meðal annars fjórum sinnum í hendur andstæðinganna sem er óvanalegt hjá honum.

Sjá einnig: Kraftaverkaendurkoma Seattle

Wilson kenndi Guði um þessi mistök en þakkaði honum einnig fyrir grátandi í leikslok.

Maðurinn sem varð að sætta sig við tap í þessum leik, Aaron Rodgers, leikstjórnandi Green Bay, var spurður út í Guð og amerískan fótbolta í útvarpsþætti.

„Ég held að Guð sé lítið að spá í útkomu leikja. Honum er annt um fólkið á vellinum. Ég hef enga trú á því að hann sé mikill áhugamaður um amerískan fótbolta," sagði Rodgers.